ARTEMARSIAIS HAHÚ FALI CHECK POINT, MEMBRU PNTL MAK ORGANIZA

Besik ona eleisaun Prezidensial no eleisaun Parlamentar, grupu artemarsiais mós hahú hamanas situasaun hodi halo aktividade check point ba malu iha tempu kalan.

Deputadu membru Komisaun B, husi bankada CNRT, Cesar Valente ‘Pilotu’ informa, check point artemarsiais nian ne’e, membru Polisia Nasionál Timor Leste (PNTL), mós hatais sivil hodi halo hotu check point.

“Iha Dili laran, iha fali ona buat ida check point, artes kriminozu sira ne’e, agora halo fali check point. Ida ne’e Polisia ba iha ne’ebé? Ha’u rona polisia balu mós tau sivil atu halo check point hotu,”levanta Cesar Valente iha plenária Parlamentu Nasional (PN), Segunda (23/01).

Tanba ne’e, nia ejiji ba Komandante Jeral PNTL atu loke investigasaun ba membru PNTL sira ne’e, hodi membru PNTL ne’ebé mak involve iha aktu check point ne’e, tenki fó sansaun ida ne’ebé sériu.

“Ema sira hanesan ne’e, tenki soe ba iha Atauro ne’eba, ou dudu sira ba hein iha Jaco ne’eba ne’e. Foti medidas aruma ema sira hanesan ne’e ba tau hotu iha Jaco hodi hein Rusa, hola tan Leaun ba hakiak iha ne’eba para sira hein”, katak Pilotu.

Iha fatin hanesan, deputadu Francisco Branco husi bankada FRETILIN mós dehan, kestaun seguransa nasionál tenki sai asuntu nasionál PN ninian.

“Preokupa ho situasaun grupu balu ne’ebé halo check point. Estadu Timor Leste tenki halo afirmasaun ba lei no orden, no ida ne’e instituisaun Estadu, liu-liu polisia tenki interven, tanba sidadaun jeral Timor Leste tenki moris hakmatek,” dehan deputadu Francisco Branco.

Alénde ne’e, Xefi bankada CNRT, deputadu Natalino dos Santos, mos dehan katak, aktus ne’ebé mak artemarsiais halo iha fatin-fatin, kria des-estabilidade ba eleisaun jeral.

“Ida ne’e preokupasoaun bo’ot tebes. Tanba ita haree atu eleisoens ona, komesa ona iha check point, no balu mós halo tauk labarik sira lakohi ba eskola tanba iha check point,” lamenta Natalino.

Tanba ne’e nia husu ba PNTL atu fó atensaun ba kazu ne’e, hodi labele impede movimentu povu nian, tanba grupu artemarsiais halo check point ba malu.

Hatan ba preokupasaun ne’e, Prezidenti Parlamentu Nasionál, Aderito Hugo da Costa, hatete, rezolusaun taka artemarsiais ne’e, agora dada’uk atu transfere ba lei.

“Tanba kaer tiha, lori ba prosesu labele halo andamentu, tanba laiha kobertura lei ne’ebé forte, agora duni lei ida ne’e atu fó solusaun,” dehan Aderito.

Lei atu regula artemarsiais ne’e, horiseik Segunda (23/01) Prezidenti PN baixa ona ba komisaun A hodi halo diskusaun.

“Ita haree iha tinan rua, rezolusaun ne’e implementa laiha forsa sufisiente, entaun solusaun mak agora lei iha ona komisaun A,”katak Aderito.cos

Jornal Nacional