Labele Hili Sala Líder iha Kongresu PD

Ha´u fo hanoin de´it ba kolega sira katak, sé imi hili sala lideres, PD bele LA HETAN oportunidade manán iha elisaun 2017. Ha´u nia orasaun no hanoin tomak hamutuk nafatin ho imi ho esperansa katak imi sei halo desizaun ho matenek.

Fízikamente dook hosi Timor, maibé fuan hamutuk nafatin ho Partidu Demokrátiku (PD) iha Timor. Nia hadomi tebes PD. Tanba ne´e, nia hakarak PD kontinua ezisti no buras ba beibeik atu sai partidu alternativu hodi kaer ukun.

Tanba hadomi demais PD, nia hakarak ema ne´ebé lidera PD iha kongresu ne´ebé mai ne´e, pelumenus hanesan Saudozu La-Sama. Nia lakohi ema ne´ebé deskonfia komete ona korupsaun kontinua lidera PD.

“Ha´u hakfodak oituan bainhira ha´u rona katak kongresu nasionál PD mai ne’e sei hetan sabutase no manipuladu ona hosi grupu ki’ik-oan ida ne´ebé iha ambisaun ´political animal´ ne´ebé kaer ona pozisaun polítika ás maibé sei kanten nafatin atu kaer pozisaun. Favór ida hanoin ema seluk. Fó fali oportunidade ba ema foun sira, liu-liu sira hosi munisípiu rurál, jerasaun foun no feto foinsa´e sira,” antigu Prezidenti PD, Saudozu Fernando La-Sama nia espoza, Jaqueline Siapno, dehan kestaun ne´e liuhusi nia status Facebook, 14 Janeiru 2017 liu-ba.

Nia sinseramente fiar katak maluk sira (kongresista) sei la hili Prezidente ka Sekretáriu Jerál hosi ema ne´ebé hafoer án ona iha hahalok korupsaun ruma. Tuir nia katak ne’e hanesan DEZASTRE boot ida sé karik kongresista sira hakarak hili nafatin lideres ne´ebé hein hela atu ba hatán iha tribunál tanba hahalok korupsaun hafoin kongresu.

“Ne’e ha´u nia esperansa ba ita hotu. Ha´u fiar katak maun Nando mós hanoin hanesan ne’e, katak imi tenki hanoin ba LONGU PRAZU nian no hanoin dook ba FUTURU iha eleisaun ba prezidenti no Sekretáriu Jerál PD nian. La´os de´it ba PD nia interese sobrevividu no integridade maibé liu-liu hametin transparánsia, akuntabilidade no demokratizasaun iha Timor Leste,” Jacqueline sujere.

Defaktu, nia haktuir, sei iha ema barak ne´ebé iha talenta di´ak, serbisu badinas, dedikadu, iha étika, kompeténsia, onestu no iha komprimísiu boot iha PD ne´ebé bele hametin valores no futuru partidu ne´ebé seidauk kaer pozisaun no hafoer án iha Governu no iha Parlamentu.

“Ha´u fo hanoin de´it ba kolega sira katak, sé imi hili sala lideres, PD bele LA HETAN oportunidade manán iha elisaun 2017. Ha´u nia orasaun no hanoin tomak hamutuk nafatin ho imi ho esperansa katak imi sei halo desizaun ho matenek,” Jacqueline haklaken.

Entretantu, atuál Prezidente PD, Adriano do Nascimento agradese no konsidera opiniaun hosi saudozu La-Sama nia espoza ne´e pertenente tanba bele fó hanoin nafatin ba PD atu la’o ba oin. Maibé, desizaun hotu-hotu entrega ba kongresu maka sei desidi nu’udar desizaun mais alta.

“Ida ne’e hanoin ida. Klaru katak nia hanesan Maun La-Sama nia ferik oan, apresia no mós orgullu tanba nia sei fó hanoin. Ne’e signifika katak nia sei akompaña maske nia iha fatin dook maibé akomapña nafatin no iha preokupasaun ba ida ne’e,” Adriano dehan ba Matadalan iha nia hela fatin, Dili, Tersa (23/1/17).

Nia dehan kuandu iha ema ruma ne’ebé hato’o nia sentimentu ba Partidu Demokrátiku ne’e hatudu iha ona sentimentu de pertensia hanesan na’in ba partidu ida hodi hadi’a di’ak liu-tan PD ba futuru.

Adriano esplika kuandu maioria desidi sé de’it maka sai prezidenti, ne´e loos ona. Nia espera katak militante no líder Partidu Demokrátiku la hili ema arbiru no sei hili ida ne’ebé di’ak ba Partidu Demokrátiku.

“Ha’u hanesan prezidente partidu apresia ema hotu nia preokupasaun tanba nia mós na’in ne’e maka hato’o preokupasaun ne’ebé pertenente atu tetu hamutuk buat sira ne’e hotu,” Adriano hatutan.

Kona-ba polítiku balun iha PD ne’ebé komete aktus korupsaun, Adriano hatán: “Koruptór ne’e ha’u hanoin hanesan organizasaun partidu polítiku, ita tenke bazeia ba provas legál. Sé Tribunál desidi ona ida ne’e koruptór ka kondenadu, klaru katak nia kriminozu ona tanba aktus korupsaun ne’e kriminalizadu”.

Maske nune’e, Adriano tenik, labele julga ema tanba rumoris ka ema ida nia opiniaun iha mídia sosiál maibé ita tenke hein desizaun ne’ebé ás liu maka Tribunál hodi desidi ema ida kondena ka lae ba aktus korupsaun.

Adraino husu atu labele halo julgamentu populár tanba sé PD halo julgamentu populár hodi haketak tiha prinsípiu prejunsaun inosénsia maka ema bele lori mós PD ba Tribunál. PD oras ne’e dadaun iha hela preparasaun ba kongresu nasional ne’ebé tuir planu sei realiza iha fulan Fevereiru ne’ebé sei partisipa hosi militante no estrutura PD nian hahú hosi suku to’o mai nível nasionál.

Nune´e mós, Deputadu PD, Virgílio Hornai hateten PD hanesan organizasaun ida mais demokrártiku hahú hosi lideransa La-Sama nian komesa promove ona lideransa partisipativu, desizaun koletivu, kria ambiénte diskusaun ida mais aberta hodi akumula hanoin sira hotu.

“Prosesu demokratizasaun la’o hela iha ami nia partidu laran, prosesu kaderizasaun la’o hela iha ne´ebá. Tanba ne’e, kader ne’e ita atu difísil define katak figura potensiál ida maka atu sai lista úniku ne’e susar,” Virgílio dehan.

Nia akresenta kongresista sira mai hosi munisípiu sira maka tenke halo aprosimasaun polítiku ba figura sira ne’e sé-sé maka sira aprezenta hanesan pakote hodi desidi ida sai Prezidente no ida sai sekretáriu jerál ba Partidu Demokrátiku iha periodu tuir mai.

Virgílio garante katak desizaun hotu-hotu iha kongresu refere akontese ho transparánsia tebes, laiha manipulasaun no halimar jogu atu afavór ba figura ka interese ema ida nian.

Prosesu kaderizasaun la’o hela iha PD nia laran, tanba ne’e tuir Virgílio katak sira defende maka’ás teze polítika ida atu konsolida iha nível estadu liu-liu oinsá maka introdus polítika demokrasia iha ita nia país.

Kona-ba lideransa PD balun komete iha kazu korupsaun, Virgílio hatán, sé Tribunál seidauk desidi maibé iha opiniaun públiku komesa julga ona ema ne’e labele.

“Ita tenke respeita ema nia direitu atu hetan nafatin naran moos nu’udar parte ida ita hatudu maturidade polítika no sibilizasaun hanesan sosiedade ida. Buat opiniaun sira hanesan prejunsaun inosensia “asas praduga tak bersalah” ita tenke prezenva nune’e ita labele julga ema,” Virgílio esplika.

Nia informa nunka atu hamout integridade PD nian tanba Tribunál rasik laiha desizaun ida ne’ebé dehan katak líder PD nian ida ne’e komete krimi korupsaun ne’ebé halo lakon osan Estadu nian.

Nia husu ema hotu atu promove edukasaun informasaun atu ema hotu bele hato’o informasaun ho koerensia, labele hamosu beibeik prezunsaun inosénsia hodi hamosu beibeik dúvida perante públiku.

Tuir Membru Komisaun Estudu Estratéjiku no Planeamentu PD, Christopher Henry Samson katak PD mai ho hanoin ida harii Timor foun, ba timor-oan tomak, tan ne’e laiha asuntu korupsaun ne’ebé bele sai obstákula ba dezenvolvimentu PD iha rai ida ne’e. Tanba bainhira ema ida komete erru korupsaun ne’e la’os problema partidu nian, maibé ne’e individu nian tenki hasoru justisa.

“Nu’udar Diretór Ezekutivu ba ONG Lalenok ba Ema Hotu, no mós membru ida hosi PD ne’ebé halo serbisu ida bolu boa governasaun no anti korupsaun. Tan ne’e, laiha dalan ida ba koruptór ida atu mosu iha PD tanba estatutu bandu,” dehan Christopher ba Matadalan iha nia kna´ar fatin, Komoro, Díli, Segunda (23/01).

Chris afirma bainhira membru ka estrutura PD ida halo korupsaun nia tenki ba hatán, respeita justisa no hakruuk ba lei. Tan ne’e, tuir nia, PD la’os judisiáriu, la kaer ema ka julga ema ida, maibé PD partidu ne’ebé mai atu dezenvolve povu ho nasaun tuir polítika ne’ebé di’ak no harii nasaun hosi baze.

Iha parte seluk, observadór polítika hosi Universidade Nasionál Timor Lorosa’e (UNTL), Camilo Ximenes Almeida katak maske Fundadór no Prezidente PD, Saudozu Fernando La-Sama de Araújo mate ona, maibé ninia espíritu atu dezenvolve PD ne’e sei iha nafatin ba jerasaun sira ne’ebé iha partidu laran.

Camilo mós hato’o ninia hanoin kona-ba rekomendasaun ne’ebé hato’o hosi eis Prezidente PD, Saudozu Fernando La-Sama de Araújo nia kaben ne’ebé husu atu labele hatama ema koruptór sira iha PD tanba bele hamonu integridade partidu nian. Camilio dehan, nu’udar partidu ida tenki haree buat sira ne’e, tanba troka ema la signifika katak ita la gosta ema, maibé tenki iha espíritu ne’ebé maka foun.

Nia salienta rekrutamentu iha partidu ida importante atu hatene lideransa ne’ebé maka atu asumi kargu iha futuru. Dosente ne´e informa PD la’os ba fundadór sira de’it, maibé ba jerasaun foun sira iha futuru. Ne’e duni, tuir nia, presiza tau ema sira ne’ebé iha espíritu matenek no hakarak luta hodi lori filosofia Saudozu La-Sama ninian, tanba La-Sama ida mate, bele hamosu fali La-Sama sanulu.

“PD tenki hakribi ba individu ou ema sira ne’ebé maka karik liman naruk (koruptór), haree de’it ninia interese hodi la tau espíritu ka interese partidu ninian,” Camilo sujere. (Jon/Anibal)

Matadalan

LEE MÓS MATADALAN