MS Deskonfia Kompaña Balun Produs Bee Galon Ilegal

DILI: Númeru komunidade ne’ebé konsumu bee galon, liliu iha Kapital Dili hahú boot ba bebeik, nune’e mosu kompaña lubuk ida ne’ebé kompete atu produs bee galon hodi antede ba nesesidade ne’e. Kompaña balun iha lisensa ba produsaun, maibé iha mós kompaña balun mak halo produsaun illegal.

Departamentu Vigilansia Sanitaria no Saúde Ambiental-Ministériu Saúde, deskonfia kompaña balun halo produsaun no fa’an bee galon illegal, maibé MS seidauk konsege identifika paradeiru husi kompaña sira ne’e.

Tuir padraun husi MS, kompaña ne’ebé produs bee galon tenke liu husi prosesu legal no tenke hetan rekoñesimentu husi MS bazeia ba rezultadu teste laboratoriu, katak bee ne’ebé produs tenke livre husi mikrobio.

“Kuandu bee ne’e livre husi mikrobio, sira bele hetan karta rekomendasaun par bele fa’an ka distribui ba konsumedór sira,” dehan Xefe Unidade Vigilansia Sanitaria no Hahan Seguru, Francisco Oliveira ba olatimornews.com iha nia knar-fatin, Kaikoli-Dili, Tersa (7/2).

Hahan Kontaminadu ho Formalin

Entretantu, hatan kona-ba inspesaun ba hahan sira ne’ebé fa’an iha loja, Francisco dehan, iha tinan ne’e sira seidauk bele hala’o programa inspesaun tanba kestaun orsamentu no sei iha transferensia serbisu no mudansa sistema husi parseiru serbisu.

"Programa inspesaun ba hahan tinan ida ne’e sei planea hela,” dehan Francisco.

Maibé, nia dehan, iha tinan 2016 sira hala’o programa inspesaun no konsege identifika ikan no supermi ne’ebé kontamina ho formalin.

“Hahan hirak ne’e ami hetan iha supermerkadu tolu mak Lider, Dili Mart no Lita Store,” informa nia.

Kona-ba sansaun, nia dehan, MS la fó sansaun ruma, maibé halo de’it sosializasaun atu iha futuru labele uza tan formalin ba hahan.

Hatan kona-ba hahan iha TL tuir estandarte saúde ka la’e, Xefe Unidade ne’e dehan, MS labele fó komentariu ba kestaun ne’e, tanba MS so halo de’it kontrolu ba hahan ne’ebé sirkula ona iha rai laran.

“Hahan sira kuaze mai husi rai li’ur no tama mai liu husi Alfandegas no Karantina, so Ministériu Saúde kontrola de’it sasan ne’ebé mak iha ona rai laran. Atu sasan hirak ne’e standarte ka la’e ne’e loloos Ministériu Komersiu (Industria no Ambiente-MKIA) no Alfandega mak toma responsabilidade," katak nia. (*)

OlaTimor - Editór: Tellukoro Jorgin – Foto: tokopedia.com