TELKOMCEL PRONTU HAKRUK BA REGRAS GOVERNU

Manejer Marketing Telkomcel, Samantha Abel, deklara, kompañia Telkomcel nu’udar kompañia komersial ida iha Timor Leste (TL), tanba ne’e sempre hakruk hodi ko’opera ho Governu iha aktividade saida deit liu-liu implementasaun lei  selu taxa ba publisidade no seluk tan.

“Telkomcel nu’udar kompañia komersial ida iha Timor Leste, tanba ne’e ami sei suporta no sei halo tuir, regras ne’ebé mak iha tantu iha ona no foin mak atu implementa,”Manajer Marketing, Samantha Abel, ba Jornal  Nacional Diário iha nia servisu fatin Timor Plaza (TP), Kinta (23/2), relasiona ho planu Governu sei implementa lei  selu taxa ba publisidade nian.

Samantha haktuir, nu’udar empreza internasional ne’ebé estabelese iha TL hakarak ka lakohi tenki moris tuir regulamentu  saida deit mak nasaun ne’e iha  nune’e aktividade saida deit mak kompañia refere hala’o bele la’o ho diak no susesu.

Tanba ne’e, Samantha dehan, Telkomcel sei  hakruk ba lei ne’ebé mak  tuir Governo nia planu sei implementa   lei kodigu penal ho númeru 51 /2006/28 de Dezembru kona ba lisensiamentu  publisidade nian.

Ne’ebé  durante ne’e  Telkomcel  mos dala barak hasai publisidade, maibe nia prosesu pagamentu la hala’o direta ba iha Governu, maibe liu husi kompañia balun ne’ebé mak  nu’udar parseiru Telkomcel nian.

“Durante ne’e ami selu ba kompañia sira ne’ebé mak nu’udar ami nia parseiru tanba sira mak iha fatin entaun ami selu ba sira tanba sira mak iha ona lisensa no seluk tan,”dehan Samantha.

Antes ne’e Governu liu husi Sekretária Estadu Administrasaun Estatal (SEAE), hala’o sosializasuan ba dekretu lei publisidade ho objetivu atu  regulariza  entidade sira ne’ebé mak durante ne’e hasai publisidade tuir sira nian hakarak.Ola

Jornal Nacional Diário