PN Preokupa Kanpres Balun Uza Liafuan Lorosae Loromonu

DILI - Reprezentante povu iha uma fukun Parlamentu Nasional (PN) preokupa tebes Kandidatu Prezidente (Kanpres) balun liu-liu nia ekipa susesu sira koalia iha palku publiku uza liafuan loro monu no lorosae.

Tuir Deputadu Bankada Fretilin, Lionel Marçal katak, presiza halo intervensaun ba kandidatu balun liu-liu ekipa susesu neebe mak uza liafuan lorosae no loromonu iha kampania.

Liafuan lorosae loro monu nee ita iha esperensia tiha ona, ita hamoris nafatin ida nee ninia rohan mak instabilidade,” Deputadu Lionel levanta asuntu nee liu husi sesaun plenaria iha uma fukun PN-Dili, Tersa (14/03/2017).

Deputadu Lionel prekupa, liafuan nee, oras nee sirkula makas tebes iha povu nia leet kuaze povu sira iha suku sira neebe mak izoladu mos preokupa tebes halo sira mos trauma.

Deputadu Lionel salenta, kandidatu ba prezidente republika atu sai aman ida ba nasaun no povu ida nee mak uza fali liafuan ida lorosae no loromonu, se karik nia eleitu nia liafuan koalia nee oinsa ita nafatin liafuan lorosae loromonu ita lahadomi ita nia nasaun.

Iha fatin hanesan, Deputada Bankada Fretilin, Anastaçia da Costa haktuir, lider partidu fo eduka sivika ba militante sira oinsa atu door to door ou lobi povu sira atu vota laos lori fali lorosae loromonu. Raimundo S. Fraga

Suara Timor Lorosae