Asanami, Husu Fretilin-CNRT Vota Ba PD

VIQUEQUE – Prezidente PD, Mariano Asanami Sabino husu ba inan aman sira iha Viqueque atu votu ba PD tamba partidu PD fiar metin iha inan aman sira iha atu vota ba PD numeru 13.

Tuir Prezidente Demokratiku, Mariano Asanami Sabino iha kampania datolu hateten, Kompaneiru sira ita ohin (Kinta-red) ouituan deit, hau lalika koalia barak ida tamba hau fiar metin iha hau nia inan aman sira husi Viqueque laran rona hela no sira husi partidu seluk rona hela.

“Hau husu votu ba PD tamba nee husu ba inan aman sira numeru tuu ba numeru 13, hau mos husu ba Fretelin, hau husu ba CNRT atu vota ba PD, kompaneiru ami sira imi nia oan sira, maubere oan sira ami uluk tau kamiza hakerek Fretelin iha militar Indonesia nia oin no tama too iha the zoo hodi hakarak hatene ami nia direitu,” dehan Asanami, iha kampu futebol Biloi, Viqueque, Kuarta (22/06/2017).

Nia hatutan, maske iha situasaun difisil nia laran no funu nia laran ami hakarak fo ami nia kakorok ba maun Xanana, no ohin ami sei moris hela, ami hakarak dezenvolve rai ida nee. PD ninia hakarak ba maun boot sira nee diak liu tur deit hodi tau matan ba jerasaun foun kuandu kaer ukun la lao tuir prinsipiu fundamental konstituisaun nian.

“Kuandu ami kaer ukun mak la diak maun boot sira diak liu hare no observa no kuandu la aselera dezenvolvimentu hase kedas katak ida nee la diak, ida neeba mak diak tamba nee ami prontu buat hirak nee kuandu sira tur nuudar aman ba nasaun,”dehan Asanami. Domingos da Piedade Freitas

Suara Timor Lorosae