Lú-Olo Promete Sei Tau Matan ba Toos-Na’in

DILI, (TATOLI) - Prezidente da Repúblika (PR) Francisco Guterres Lú-Olo promete sei halo esforsu hotu hodi tau matan ba toos-na’in sira nia preokupasaun liu-liu hasa’e produsaun lokál.

“Prezidenti Repúblika hateten ona ba toos na´in sira katak nia (Prezidenti) sei tau matan ba toos na´in sira nia preokupasaun,” reprezentante Uniaun Agrikultura Ermera, Alberto Martins Guterres, hato´o informasaun ne´e ba jornalista sira iha Palásiu Prezidénsia Repúblika, Bairu-Pité, Dili, Tersa ne´e, hafoin ramata fó sira nia apresiasaun ba Xefi Estadu Lú-Olo.

Reprezentante movimentu tolu hanesan Movimentu Populár Reforma Agraria, Uniaun Agrikultura Ermera no Kdalak Sulimutu Institute ohin hala´o inkontru ho Prezidenti Repúblika, Dr. Francisco Guterres Lú-Olo, ho objetivu fó apresiasaun ba xefi Estadu ne´ebé maka promulga ona Lei Rejime Espesiál Titularidade (Lei Rai).

Tuir sira nia observasaun lei Rai hanesan gia marsa ida ba toos na´in sira hodi bele garante saida maka toos na´in sira halo iha toos laran. Maibé bainhira laiha lei, toos-na’in labele halo buat ida iha toos laran.

Iha biban ne´e, reprezentante hosi movimentu tolu ne´e rekomenda ba Prezidenti Repúblika atu asegura lei ne´e bele la´o di´ak iha baze, hala´o kapasitasaun ba toos na´in sira atu hasa´e produsaun lokál no Estadu presiza fó subsídiu ba toos na´in sira.

Jornalista: Xisto Freitas | Editór: Manuel Pinto

Foto: Reprezentante Uniaun Agrikultura Ermera, Alberto Martins Guterres, ko´alia ba jornalista sira. Imajen Ajénsia TATOLI/Xisto Freitas