Xanana Eskritór, La’ós Polítiku De’it

DILI, (TATOLI) - Banda Klibur Funu Na’in Naroman fó omenajen ba eis-lider rezisténsia, Kay Rala Xanana Gusmão ne’ebé komemora nia aniversáriu iha 20 juñu ne’e ho aprezentasaun literatura, tanba konsidera Xanana nu’udar eskritór, no literatura ida iha Timor.

“Ami fó omenajen ba Xanana nia aniversáriu liuhusi literatura,” responsável banda, Abe Barreto iha nia aprezentasaun kona-ba “Literatura timorense em debate – Debate sobre o Poeta Xanana Gusmão e Poemas recitados e cantados” iha Fundação Oriente, iha fin-de-semana ne’e.

Hodi hatutan mós katak sira organiza atividade ida ne’e tanba konsidera katak eis-lider rezisténsia ne’e la’ós nu’udar polítiku de’it maibé mós nu’udar aman ida ba literatura.

“Hakarak fó koñese ba públiku katak Xanana ne’e eskritór, literatura ida, la’ós polítiku de’it,” poeta timoroan ne’e akresenta.

“Xanana nu’udar mós poeta kontamporaneu boot ida,” nia reforsa hodi diriji tan ba eis-lider rezisténsia ne’e.

Entretantu atividade ne’ebé banda ne’e hala’o durante aprezentasaun mak debate kona-ba poema Xanana nian: “Mar Meu”. Nune’e mós halo leitura públiku kona-ba poema esperança rasgada, jerasaun ho autór husi Xanana rasik inklui knananuk ho títulu, Tansa ita Lemorai husi Abe Barreto.

Iha biban hanesan, iha atividade “Literatura timorense em debate” ne’e iha mós atuasaun husi foinsa’e timoroan sira, feto no mane ne’ebé hadomi literatura no hetan apresiasaun husi partisipante sira.

Partisipante sira mak hanesan profesór sira, estudante nomós públiku enjerál.

Jornalista: Rafy Belo | Editór : Manuel Pinto

Foto: Kay Rala Xanana Gusmão