JSMP Fasilita Jornalista Komprende Termu Jusdisial

DILI, (TATOLI) - Judicial  System Monitoring Programme (JSMP), ohin organiza mídia briefing iha Bidau Akadiru-Hun, Dili hodi fasilita Jornalista sira komprende termu judisial ne’ebé mak uza iha faze prosesuál.

Diretór Ezekutivu JSMP, José Luis Sampaio hatete, programa ne’e realiza tanba ema hotu rekoñese papél jornalista importante tebes hanesan liman no ain sosiedade nian.

“Ita fahe esperiénsia no koñesimentu ba malu atu fasilita ita-boot sira hatene prosesu ne’ebé ligasaun ho setór justisa, termu sira ne’ebé mak ita uza, faze prosesuál ne’e iha ne’ebé, bainhira mak ita konsidera ne’e hanesan suspeitu, arguidu no kondenadu,” José esplika iha mídia briefing ne’ebé organiza husi Mai Munisípiu iha Bidau Akadiru-Hun, ohin.

Objektivu seluk hosi mídia briefing aumenta kapasidade no hanoin jornalista nian buka kle’an informasaun sira ne’ebé mak iha relasaun ho interese públiku nian atubele deskobre hodi informa ba komunidade no hosi komunidade ba instituisaun Estadu sira.

Entertantu termu suspeitu mak ema ne’ebé iha sinál sira atu halo kríme ruma, no prosesu investigasaun seidauk la’o ka sei deskonfia hela.

Arguidu mak ema ne’ebé tama iha prosesu investigasaun no kondenadu mak ema ne’ebé hetan desizaun finál hosi tribunál no laiha  tan rekursu.

Bainhira rekursu karik signifika kazu ne’e matak hela. “Dala barak kahur, ezemplu, kazu iha tribunál deside tiha ona ema ne’e sei halo rekursu maibé hanoin katak kazu ne’e remata ona,” José dehan.

Hodi hatutan, ho programa Mai Munisípiu bele ajuda jornalista sira atu koñese no atualiza di’ak liután koñesimentu ba kestaun termu setór judisiáriu nian.

Nia mós rekuñese katak, durante ne’e mós mídia sira halo buat balun di’ak ona, maibé iha buat balun presiza hadi’a liuliu ba termu sira ne’ebé mak envolve labarik ho minoridade sira-nia identidade tenke proteje no kazu sira ne’ebé mak lei bandu atu halo publikasaun, tanba nia segredu justisa, sei iha prosesu investigasaun.

JSMP hein katak, ho mídia briefing mídia sira bele aprende hamutuk atu haree saída mak kestaun segredu, investigasaun kriminál, papel husi instituisaun judisiáriu sira atu bele ajuda sosiedade hatene prosesu ne’e tuir nia fatin.

Iha fatin hanesan jerente asesu ba Justisa Fausto Belo Ximenes hatete liuhusi diskusaun informál ida ne’e, importante ba jornalista atu hatene no fahe konesimentu hodi kobre asuntu justisa ho di’ak, liuliu impaktu ba kazu sira iha tribunál atu kobre ho di’ak tuir prosesu lei no regra sira ne’ebé iha.

“Ami haree iha termu balun ne’ebé seidauk klaru no loos tuir ita-nia monitorizasaun iha kobertura ne’ebé ami hetan ezemplu, bainhira ita haree ema ne’e sei suspeitu hela no ita uza termu seluk ne’ebé loloos ne’e la merese ba faze kazu sira ne’ebé mak iha entaun ami sente katak di’ak liu ita tuur hamutuk hodi fahe hanoin kona-ba ida ne’e,” Fausto kurizi.

No konsidera diskusaun ne’e la’ós atu avalia mídia nia serbisu maibé fahe konesimentu oinsá mak jornalista sira bele kobre justisa no uza termu ne’ebé merese tuir lei ne’ebé vigora iha país ida ne’e.

Jornalista: Maria Auxiliadora | Editór: Manuel Pinto

Foto: Diretór Ezekutivu JSMP, José Luis Sampaio koalia ho jornalista sira.