Money Politic Hamate Demokrasia

DILI, (TATOLI) - Portavoz Partidu Libertasaun Popular, Fidelis Magalhaes, konsidera atetude money politic iha kampaña nu’udar hahalok inkonsiderasaun ba povu no hamate demokrasia, iha estadu Direitu Demokratiko.

“PLP (Partidu Libertasaun Popular) lauza osan sosa votu, prinsipiu PLP nian la fi’ar aktus sosa votu tanba ida ne’e hamate sidadaun nia direitu iha elisaun,” Fidelis Magalhaes informa ba Jornalista sira iha Media Centre PLP, Fatuhada, Segunda (02/07), hodi hatan ba deskonfiansa públiko nian katak iha periudu kampaña iha ona partidu balu mak utiliza osan hodi sosa votus hosi eleitores.

Tuir Fidelis, se akontese partidu balun mak iha periudu kampaña sosa votu, husu atu sidadaun sira simu tiha osan, maibé bainhira hatak ba urna tenki ho vota ho konsensia basa osan ne’ebé mak partidu sira fó sei uza hotu iha loron ida ou rua, maibé bainhira diside sala votu mak sei simu konsikuensia durante tinan lima.

Nia esplika PLP moris ho mehi ida katak, Timoroan sira iha hakarak atu halo mudansa. ho vizaun liberta Pátria no halo Timor-Leste sai País ida-neébé Forte, Riku no Seguru.

Atu konkretiza Vizaun ida-ne’e, se karik PLP hetan konfiansa atu ukun, PLP sei konsentra, iha tinan lima tuirmai, iha área boot lima, ida mak  Reforsa Independénsia Nasionál liuhosi promosaun sistema ekonómiku ida-ne’ebé viavél, koerente no sustentável, hanesan mós ho konsolidasaun Identidade Nasionál.

Segundu, Defeza, Integridade Territoriál no Soberania Nasionál liuhosi hadi’a, entre outrus, iha nível sistema defeza no seguransa, konsiensializasaun públika no diplomasia.

Terseiru, Konstrusaun Sistema Ekonómiku ida-ne’ebé Koerrente no Sustentável esensialmente liuhosi kualifikasaun ba Timor nia rekursu umanu, konsolidasaun setór privadu nasionál atu sai interveniente liután, utilizasaun rasionál ba rekursu umanu, kombate dependénsia esterna no kriasaun setór ekonomia ne’ebé forte liután.

Dahat, Konsolidasaun Unidade, Koezaun Sosiál no Demokrasia liuhosi rekoñesimentu ba sidadaun sira-nia direitu fundamentál sira, fó resposta ba nesesidade bázika sira no reforsu ba toleránsia.

Dalimak, Integrasaun Rejionál no Internasionál liuhosi partisipasaun ida-ne’ebé ativa liután iha organizasaun sira-ne’ebé Timor-Leste pertense ba, ho maneira espesiál iha ONU no CPLP, nune’e mós promosaun ba esforsu sira hotu iha sentidu atu tama ba ASEAN, konsolidasaun relasaun ho país sira hotu iha rejiaun ne’e no parte seluk mundu nian, kumpri konvensaun sira hotu, paktu no memorandu entendimentu sira-ne’ebé ratifika no asina tiha ona hosi Timor-Leste, kooperasaun ativa ho orgaun Estadu sira hotu iha akordu sira iha futuru, no preparasaun Timor-Leste nian ho vistu ida atu tama ba iha Commonwealth.

To’o notisia ne’e tun seidauk iha evidensia ruma mak justifika ba públiku katak, durante kampaña eleitoral iha ona partidu balun komete aktus money politic alias sosa votu, maibé akuzasaun money politic mosu de’it hosi liafuan polítiku sira nian.

Ekipa Kobertura | Foto: Fidelis Magalhaes