Tribunál Halo Interrogatóriu ba Estudante Sira Kontra Lelaun PRADO $8000 De'it

DILI: Estudante husi organizasaun Movimentu Universitáriu Timor-Leste (MUTL) hamutuk na’in 13 tenke ba hataan iha Tribunál Distritál Dili (TDD) hodi responsabiliza ba hahalok krime ne’ebé harahun patrimóniu Estadu nian, iha momentu halo asaun protesta hasoru polítika leilaun Prado Parlamentu Nasionál.

Tribunál Distritál Dili, Kuarta (23/8), loke primeiru interrogatóriu estudante na’in 13, tanba deskonfia komete krime danu agravadu ho obstrusaun autoridade públiku, bainhira halo asaun manifestasaun iha Segunda, 21 Agostu 2017, iha tuku 10:13 Otl.

Primeiru interrogatóriu ne’ebé taka ba públiku aprezenta arguidu DA, MAMS, NBX, JS, AMF, TM, LS, LA, JB, AP, J no MS.

 Tuir akuzasaun Ministériu Públiku (MP), akontesimentu ne’e tanba manifestasaun no tuda rahun karreta Estadu. Tanba ne’e, akuza arguidu sira ho krime Danu Agravadu, ne’ebé previstu iha artigu 259 Kódigu Penál ho ninia pena prizaun tinan 2 to’o tinan 8 ka multa.

Nune’e mós, Krime Obstrusaun Autoridade Públiku, ne’ebé previstu iha artigu 243 Kódigu Penál no pena prizaun tinan 2 to’o tinan 6.

Audiénsia julgamentu ne’e prezide husi juis singulár Ana Paula, Ministériu Públiku reprezenta husi Prokuradór Bartolomeu de Araújo no arguidu sira hetan asisténsia legál husi advogadu Privadu Alcino Soares Gomes, Júlio da Silva no Aquino Dias.

Independente