Media Lamenta Sistema Foun PN, Lataka Dalan

DILI – Parlamentu Nasional (PN) aplika sistema foun ba jornalista sira husi media hotu bazeia ba despaisu Prezidente PN numeru 8/2017, katak kuandu hasoru Prezidente PN no serbisu komisaun nian liu husi portavoz. Ho razaun nee, jornalista sira lamenta tebes no tuir sira, Prezidente Parlamentu sesante koopera diak ho media.

Tuir Nilva Guemaraes hanesan Asesora Media, Gabinete Prezidente PN hatete, agora PN iha ona nia portavos atu hatoo informasaun ba jornalista sira husi media hotu neebe informasaun portavos mak sei koalia, kada semana iha loron Kinta.

“Agora dadaun Parlamentu Nasional iha ona portavoz, ida atu hodi halao komferensia imprensa ba media sira kona ba atividade PN nian, hahu husi Prezidente PN too komisaun no deputadu sira portavoz mak bele koalia. Maibe, karik iha asuntu ruma kona ba politika sensitivu liu Prezidente mak bele koalia,” katak Nilva iha PN bainhira halao komferensia imprensa iha PN Kinta (28/09/2017).

Nia hatete, kona ba atividade kada semana ida nian portavos mak sei bele fo sai ba media sira, i kada semana halao komferensia imprensa dala ida iha loron kinta.

Iha fatin hanesan Jornalista husi Jornal Independent Jacinto Xavier preokupa tanba dalabarak jornalista sira hasoru ona malu ho prezidente PN aktual, maibe dala ruma susar oituan. Se karik halo komparasaun ba mandatu III no IV lejislatura iha PN Sistema la hanesan, tanba iha III lejislatura Prezidente PN bainhira media sira hasoru sempre fo informasaun, iha tempu no fatin neebe jornalista sira husu atu intervista, i eis Prezidente tuan nee mos sempre koopera diak ho media sira.

Maibe haree ba mandatu IV lejislatura iha oin seluk ona, tanba agora iha ona portavoz atu bele koalia ba media, ida nee bele dehan katak susar ba media atu hasoru Prezidente PN atu halo intervista. Tanba nee, nudar jornalista lamenta ho Sistema Prezidente PN agora, iha diferensa los ho eis Prezidente Aderito Hugo.

Hatan ba kestaun nee, tuir portavoz Lidia Norberta liu husi komferensia imprensa katak iha mandatu IV lejislatura nee laos atu taka aan ba media, maibe atu nakloke aan publiku, ho meius barak, maibe tau tuir nia dalan. Tanba nee agora dadaun PN iha ona portavoz, maibe la taka dalan ba jornalista sira atu intervista ho Prezidente PN.

Haree ba mekanizmu ida nee la taka dalan ba media sira, maibe bazeia ba despaisu Prezidente PN numeru 8/2017 fo biban ba sekretaria atu bele informa ba publiku servisu saida deit mak PN halao. Kobre husi servisu plenaria, servisu iha komisaun espesializada permanente, atendimentu votus neebe PPN halo, servisu konsellu de administrasaun no mos servisu protokolu sira nian hotu nee kompetensia portavos nian. Maibe kona ba asuntu sensitivu atu hasoru prezidente PN nee lataka dalan.

Entretantu iha biban nee jornalista sira koko komfirma ho Prezidente PN Aniceto Guterres kona ba aplika Sistema foun nee ba media sira, maibe jornalista husu atu intervista prezidente lakohi atu koalia. 

Guilhermina Franco | Suara Timor Lorosae