Organizasaun Rezisténsia Kondena Mosaun Rejeisaun

DILI, (TATOLI) – Reprezentante Organizasaun Rezisténsia hanesan OJETIL, OPJELATIL, FITUN, Sagrada Família no Aswa’in Lemorai kondena asaun Mosaun Rejeisaun ba programa Governu ne’ebé aprejenta hosi bankada parlamentár CNRT, PLP no KHUNTO iha Parlamentu Nasionál, kinta (19/10) kalan.

Portavóz Organizasaun Rezisténsia sira, José Manuel Nakfilak hateten deputadu sira ne’ebé maka hato’o Mosaun Rejeisaun ne’e la hatudu maturidade ba povu no Nasaun ne’e.

“Sira seidauk haree programa ne’e, sira prepara ona Mosaun Rejeisaun. Katak, má fé ne’e iha. Tanba ne’e maka organizasaun rezisténsia tomak ne’ebé fó án tomak ba independénsia Timor-Leste nian, hamutuk iha ne’e atu fó oin fali ba situasaun polítika atuál”, Nakfilak hato’o kestaun ne’e ba jornalista sira Sede Veteranus, Bairros dos Grilhos, Dili, kinta ne’e, hafoin halo análiza ba asaun Mosaun Rejeisaun.

Nia dehan organizasaun rezisténsia sira preparadu atu hamutuk ho partidu FRETILIN avansa ba eleisaun antisipada no sei la admite forma seluk ba rai ida ne’e.

Nakfilak haktuir katak situasaun iha aprezentasaun Rejeisaun ne’e hanesan insultu ba juventude rezisténsia no veteranu sira, tanba programa Governu atu mai responde povu no sobrevivente sira nia nesesidade maibé bele sobu fali.

Nia husu ba ema hotu liu-liu deputadu sira atu respeita líder sira tanba sira nia sakrifísiu maka ohin loron ema hotu-hotu iha Timor goza independénsia.

Nia hatutan organizasaun rezisténsia sira sei la’o hamutuk ho Primeiru Ministru, Marí Alkatiri atu halo referendu ba programa Governu iha Timor laran tomak, ne’ebé rejeitadu hosi bankada opozisaun.

Jornalista: Xisto Freitas | Editora: Rita Almeida

Foto: Reprejentante organizasaun rezisténsia halo diskusaun ba asuntu polítika rai laran, liliu mosaun rejeisaun ne'ebé aprejenta hosi bankada opozisaun. Hasoru malu ne'e hala'o iha sede konsellu veteranu Bairo Grilos, ohin. Foto Xisto Freitas