Povu Husu Parpol Fo Liman Ba Malu

DILI - Foin lalais Partidu 21 mak kompete iha eleisaun jeral liuba kotu, maibe povu fo fiar ba Patidu lima (5) mak hetan asentu iha Parlamentu Nasional, tanba nee husu ba Partidu lima nee atu iha konsensia hodi diskute povu iha rai ida nee nia moris.

Hateten Xefi suku Kaikoli Hipolito Marques Sarmento bainhira dada lia ho STL iha nia knar fatin sede Suku Kaikoli Dili Kinta (19/10/2017), katak Deputadu PN Partidu lima neebe hetan asentu iha PN hanesan CNRT, PLP, PD, KHUNTO no Fretilin. Oinsa atu fo lima ba malu tanba povu fo fiar ba sira atu desemvolve rai nee durante tinan lima (5).

Hipolito, lori povu Suku Kaikoli nia naran husu ba governu no Deputadu PN 65 oinsa atu servisu hamutuk hodi hadomi rai nee no hadomi povu ida nee, tanba povu mak fo fiar ba ba Partidu lima nee atu kaer ukun rai nee durante tinan lima. Tanba bainhira mosu krize politika povu nia susar no halerik xefi suku sira mak hatenee, nomos povu mak sai vitima.

Liu husi debate programa governu nian iha uma fukun Parlamentu Nasional Kinta Deputadu PN Bankada PD Ernesto Fernandes (alias DUDU), hateten lori Veteranus nia naran husu ba maun boot sira ou lider politika sira atu kaer liman hamutuk atu lori rai nee lao ba oin.

imi sente buat ruma ladiak ami Veteranus bele tur iha oin imi kaer liman hamutuk oinsa atu lori Nasaun RDTL nee lao ba oin,”dehan Dudu.

Tuir Ernesto, katak Veteranus hela uituan deit ona, agora “ita mesak katuas ona tanba nee husu ba maun-boot sira no lideransa politika sira atu kria paz no estabilidade, tanba povu hakilar hela mai ita neebe reprezentante povu iha uma fukun PN. Tanba nee presiza kria paz no estabilidade, nunee mos husu ba lider politika sira antes atu mate rai hela buat diak ba serasaun foun ba rai ida nee. nia salenta.

Tuir Deputada PN Angelica da Costa, hateten programa governu nian neebe aprezenta ou debate iha uma fukun PN, sei hadia povu nia moris, tanba programa neebe governu apresenta akumula buat barak iha laran, nunee mos iha kampana iha eleisaun jeral liuba kotuk programa sira nee “ita promete ona ba povu”.

Tanba nee nia louva programa setimu governu nian neebe apresenta mai PN, nomos nia fiar katak lideransa antigu Senhor Mari Alkatiri, no Senhor Dotor Jose Ramos Horta, nomos membru governu sira seluk sei  hadia povu nia moris no lori Nasaun nee lao ba oin. 

Augusto da Costa | Suara Timor Lorosae