Komandante hosi forsa defeza timoroan nian apela ba populasaun hodi hakmatek nafatin

Komandante hosi forsa defeza timoroan sira nian apela ona, iha loron-sesta ne'e, ba populasaun hodi "kontinua ho sira nia moris hanesan baibain" iha momentu atual hosi tensaun polítika, hodi garanti katak autoridade sira sei la permiti violasaun ruma ba lei ka orden.

"Nu'udar komandante hosi forsa sira ne'ebé garanti seguransa Estadu, lei, orden no dame nian, ha'u apelu ba ema tomak iha Timor-Leste hodi kalma nafatin. Situasaun hanesan kontroladu. Nasaun hanesan seguru", hatete hosi Lere Anan Timu, komandante hosi Forsa Defeza sira Timor-Leste (F-FDTL) nian.

"Ema ne'ebé de'it, hosi ki'ik to'o boot, líder ka la'ós líder, labele estraga situasaun. Bainhira hamosu problema sira, forsa armada sira no polísia sei foti medida nesesáriu sira", nia hatete ona iha deklarasaun sira ba jornalista sira hamutuk ho komandante hosi Polísia Nasional Timor-Leste (PNTL) nian, Júlio Hornay.

Responsável na'in rua ba forsa sira seguransa nasaun nian ko'alia hafoin hasoru malu ho Prezidente Repúblika, Francisco Guterres Lu-Olo, liutiha loron ida hafoin opozisaun aprova tiha iha Parlamentu Nasional proposta ida hodi rejeita programa Governu nian.

Esplika katak situasaun hanesan hakmatek total, Lere Anan Timur ko'alia ba "povu, ba juventude, ba deputadu sira, ba líder sira, ba intelektual sira", hosi nasaun ne'e hodi husu kalma iha tempu ne'ebé "deputadu sira hasoru malu iha Parlamentu Nasional hodi desidi futuru Timor-Leste nian".

"Iha situasaun atual, populasaun senti tauk oituan, tauk atu líder sira bele estraga situasaun. Bele haree katak ladún iha movimentu iha estrada, iha munisípiu sira ema hotu akompaña situasaun", nia afirma.

"Maibé buat hotu kontroladu. Labele halo boatu sira. Sé maka estuda, estuda nafatin, sé maka halo negósiu kontinua ho nia negósiu. Kontinua ho moris hanesan baibain. Ami, hosi aparellu Estadu nian, ami iha ne'e hodi garanti normalidade no seguransa", nia hatete.

Komandante F-FDTL nian hatete katak demokrasia iha regra ne'ebé maka tenki respeita no fó hanoin "maturidade no responsabilidade" ne'ebé populasaun hatudu iha asaun eleitoral sira iha tinan ne'e, prezidensial sira iha fulan-Marsu no lejislativu sira iha fulan-Jullu no ne'ebé maka tenki harii iha susesu ne'e.

Lere Anan Timur hatete katak objetivu hosi jerasaun antigu sira maka hatudu ba foin-sa'e sira saida maka sira aprende ona hosi sira nia sala, tanba "bainhira líder sira laiha esperiénsia, entaun sira la'ós koerente, nasaun sei marka asaun".

"Iha situasaun atual ne'e, bainhira ko'alia kona-ba falta maturidade polítika hosi líder joven sira ne'e, ami, hosi jerasaun tuan, ami nia objetivu prinsipal maka estabilidade nasional, hodi bele prodúz progresu no dezenvolvimentu nasaun nian", nia hatete.

Iha avizu ikus, Lere Anan Timur hatete ona katak forsa armada sira no polísia sei la "tolera anarkizmu ruma iha Timor-Leste, hosi ema ne'ebé de'it, to'o nia baze" no katak seguransa sei halo asaun nafatin "hasoru sé maka viola prinsípiu sira no lei sira".

Iha loron-kinta, hafoin votasaun ba proposta, líder polítiku timoroan sira, inklui primeiru-ministru, halo ona apelu ba populasaun hodi mantén kalma.

Proposta ne'e aprova ho apoiu hosi bankada sira Congresso Nacional da Reconstrução Timorense (CNRT) no Partidu Libertasaun Popular (PLP) - lidera hosi eis-Prezidente sira no líder istóriku timoroan sira Xanana Gusmão ho Taur Matan Ruak - no hosi deputadu sira hosi Kmanek Haburas Unidade Nacional Timor Oan (KHUNTO), ne'ebé foin maka estreia iha parlamentu iha lejislatura atual.

SAPO TL ho Lusa