Tensaun Polítika Provoka Presu Nesesidade Báziku Sa'e

DILI: Dezde polítiku na’in sira ‘hadau malu’ ba ukun, fó implika mós ba ekonomia iha rai laran. Hafoin eleisaun lejizlativa presu nesesidade báziku iha merkadu kontinua aumenta.

Observasaun diáriu ne’e nian iha terrenu presu nesesidade báziku la la'o normál. Folin sasán husi kontinua aumenta iha kada fulan.

João da Silva, na’in loja Buras, Audian, hateten, kompara kapasidade kompra entre fulan Setembru ho Outubru, folin sasán la’o la normál. Presu ba nesesidade báziku hanesan foos, trigu, mina no masin-midar kontinua sa'e kada fulan.

Iha fulan kotuk, folin sasán ladún sa’e, maibé iha Outubru ne’e nia laran komesa aumenta. Foos nia folin hetan aumenta $0.25. Ezemplu, foos kilograma 25 ne’ebé antes ne’e fa’an ho folin $11 to’o $11.50 agora sa'e ba $11.75 to’o $12.

“Nesesidade báziku iha ami nia loja komesa menus, tanba prosesu tarde iha portu”, dehan João, iha Audian, horisehik. Nia esplika, sasán nesesidade báziku ne’ebé fa’an iha loja ne’e, iha fulan ida ikus ne’e hotu lalais.

Iha fatin ketak, Deputada Ana Bela hatete, iha semana kotuk folin sasán nesesidade bázika komesa sa'e iha merkadu.

Nia dehan, situasaun ne’e akontese tanba iha ema irresponsavel balun lansa rumor dehan situasaun seguransa rai laran la estavel.

Ne’e duni, prejudika ba presu foos barak agora sa'e makaas iha merkadu. Normalmente foos kilograma 25 ho presu $12, maibé fatin balun agora sa'e to’o $16.

Iha fatin hanesan, Deputada Albina Marçal hatete, sasán nesesidade bázika daudaun ne'e folin sa'e makas iha merkadu tradisionál Munisípiu Lautem.

Ne’e duni, husu ba ministériu relevante sira atu bele halo intervensaun lalais.

Primeiru Ministru, Mari Alkatiri, mós preokupa ho situasaun ne’e hodi orienta ona nia ministru atu bele halo kontrolu no intervein ba folin sasán iha merkadu sira.

Presu Nesesidade Báziku Sa'e Durante Fulan Haat

Entretantu, Diretór Jerál Regulasaun Komersiál, Domingos Guterres hatete, presu sasán nesesidade báziku ne’ebé sa'e iha merkadu tanba kauza husi loron finadu (matebian) ne’ebé besik daudaun ona.

Nia esplika, tama ba fulan Setembru, Outubru, Novembru no Dezembru, emprezáriu sira halo preparasaun makaas, tanba fulan hirak ne’e nia laran kapasidade kompra sa'e. Nune’e, hamosu mós espekulasaun presu mós dala ruma akontese.

“Iha fulan sira hanesan ne’e governu iha parte ida mós atu haree espekulasaun ida ne’ebé ladún fó benefísiu ba konsumidór sira. Tanba ne’e, ami mós sei halo intervensaun alternativa liu husi Diresaun Centru Lojístika Nasionál”, dehan Domingos, iha knaar fatin, Fomentu-Bebora, horisehik.

Nia esplika, tuir Dekretu Lei 29/2011 kona-ba presu re-inventa tenke iha justifikasaun ne’ebé reflete ba buat ruma, nune’e lukru ne’ebé distribuidór hetan labele liu 10%.

Maski nune’e, informasaun husi munisípiu balun dehan, presu foos sa'e signifikadu liu lukru 10%, tanba ne’e tenke justifika klaru tanba saida mak folin sa'e.

“Ami sei koordena ho liña ministeriál sira ho Alfándega no parte AIFESA nian. Ami sei haree ba kestaun ida ne’e”, dehan nia.

Nune’e, Governu mós sei halo intervensaun ba foos iha merkadu rua ho mekanizmu rua. Liu husi kompañia mak sei halo prosesu no ida seluk Governu halo diretamente hodi normaliza presu foos.

Iha fatin hanesan, Diretór Ezekutivu CLN, Jacinto Paijo hatete, Governu iha stock foos ho modelu rua, ida importasaun no seluk produtu lokál hare kulit.

Foos importasaun sei iha tonelada 312.000 no hare kulit prosesu ba foos iha tonelada 113. Nune’e, planeia ona atu sosa tan tonelada 190.000.

Independente