Kazal ne'ebé halai hosi justisa Timor nian husu ba PGR portugés atu halo extradisaun ba Portugal

Portugés sira Tiago ho Fong Fong Guerra, kaer ona iha Austrália tanba tama ilegal hafoin halai hosi justisa Timor-Leste nian, husu ona ba Prokuradora-Jeral Repúblika portugeza nian atu husu nia extradisaun ba Portugal, informa hosi kaben-na'in nia advogadu iha loron-sesta ne'e.

"Pedidu internasional hosi extradisaun ba Portugal ho detensaun provizóriu" haruka ona ba Prokuradora-Jeral Repúblika portugeza nian, Joana Marques Vidal, ho koñesimentu ba ministra Justisa portugeza, Francisca Van-Dúnem, no ba ministru Negósiu Estranjeiru portugés, Augusto Santos Silva, haktuir hosi karta advogadu nian ne'ebé maka Lusa iha asesu.

Portugés na'in rua, Tiago Guerra ho nia feen, Fong Fong Guerra, agora kaer hela iha Northern immigration Detention Centre, iha Darwin, "tanba tama ilegal iha teritóriu australianu iha loron 09 Novembru 2017 liubá".

Sira na'in rua hetan ona kondenasaun iha fulan-Agostu hosi grupu juís ida iha Tribunal Distrital Díli ba kadeia efetivu tinan ualu ho indemnizasaun ida ho dolar rihun 859 tanba naok (uza fraudulentu iha osan públiku sira nian). Sira apela ona ba sentensa, hodi konsidera katak "hanesan vítima hosi inkapasidade hosi sala sira" ne'ebé maka mosu beibeik iha "rejimi sira ne'ebé la'ós demokrátiku", ho baze hosi prova sira ne'ebé iha manipulasaun ka proibidu.

Tiago ho Fong Fong Guerra semana-semana tenki aprezenta aan iha autoridade timoroan sira maibé halai ba Austrália ho ró iha loron 09 Novembru.

Tanba entrada ilegal iha Austrália ne'e maka agora kaben-na'in ne'e husu extradisaun ba Portugal, ne'ebé sira hakarak hetan julgamentu iha ne'ebá, tuir liafuan hosi kaben-na'in nia advogadu ba Lusa, Pedro Mendes Ferreira, hodi hatutan katak "laiha ligasaun ho krimi" ne'ebé maka hodi julga sira iha Díli.

Kaben-na'in nia advogadu hatete katak iha Tratadu Extradisaun ida entre Portugal ho Austrália (ratifika hosi parlamentu portugés iha tinan 1988) no fó hanoin katak ne'e la akontese entre Timor-Leste ho Austrália.

"Nune'e, no tanba iha pedidu konkorente sira extradisaun nian (Portugal ho Timor-Leste), iha tempu hanesan, hosi parte kontratante ida iha Tratadu no ida seluk Estadu ida lahó akordu extradisaun nian, no tanba faktu ne'ebé la hanesan, Estadu rekeridu [Austrália] tenki desidi tanba kontraditóriu hosi pedidu extradisaun hosi Estadu Timor-Leste nian", hatete hosi advogadu kaben-na'in portugés nian iha karta ne'ebé haruka ba PGR portugeza.

Iha fatin seluk, advogadu hosi kaben-na'in ne'e husu mós - ho baze iha tratadu extradisaun nian entre Portugal ho Austrália - "detensaun provizóriu" hosi portugés na'in rua, "hanesan asaun préviu hosi pedidu formal extradisaun nian". Detensaun ne'e bele husu liuhosi Interpol, hatete hosi advogadu.

Sidadaun na'in rua ne'e to'o iha Austrália ho pasaporte portugés ne'ebé fó sai foin lalais ne'e hosi embaixada portugeza iha Díli - prosedimentu ne'ebé hamosu artigu krítiku sira iha imprensa timoroan - maibé lahó vistu ba entrada importante sira hodi tama legal iha nasaun.

Iha loron-segunda, xefe diplomasia portugeza hatete katak Portugal fó hela apoiu konsular ba Tiago ho Fong Fong Guerra, hodi fó hanoin mós "respeitu maka'as" ba sistema judisial timoroan nian.

"Ha'u konfirma mós katak portugés na'in rua, ne'ebé hein hela atu tribunal superior ida hosi Timor-Leste halo prosesu rekursu hodi halo intervensaun hasoru sentensa judisial ida hpsi instánsia dahuluk, sira hanesan titular hosi pasaporte portugés", hatete hosi Augusto Santos Silva, hodi espesifika katak sira na'in rua renova ona kartaun sidadaun sira nian iha inísiu tinan ne'e, no foin lalais husu ona no emiti ona pasaporte portugés.

Prokurador-jeral Repúblika timoroan nian, José Ximenes, konfirma ona ba Lusa katak autoridade timoroan sira prepara hela orden kaptura nian ba kaben-na'in ne'e.

SAPO TL ho Lusa