Karta Xanana ba Lú Olo, Responde ba Dialogu

DILI - Prezidente Partidu CNRT Xanana Gusmao manda ona karta ida ba Prezidente Republika Francisco Guterres Lú Olo liu husi nota komunikadu. Ho ida nee husi parte Observador Politiku konsidera karta nee nudar nota ida hodi responde ba Dialogu neebe maka Xefe Estadu rasik inisia foin lalais nee, entre lider politiku Xanana Gusmao, Mari Alkatiri no Taur Matan Ruak.

Tuir Observador Politiku Universidade Dili (UNDIL) Francisco Mausoro katak nia parte konsidera karta neebe Kinta nee Prezidente Partidu CNRT Xanana Gusmão manda ba Prezidente Republika, nudar nota hodi kooresponde ba dialogu neebe maka husi parte Xefe Estadu inisia ho lider nasional sira.

“Hau konsidera karta nee hanesan resposta neebe maka Lider Partidu CNRT Xanana Gusmao hodi hatan ba karta neebe maka husi Xefe Estadu Francisco Guterres Lu Olo rasik atu promove dialogu ho lider nasional Xanana Gusmao, Mari Alkatiri no Taur Matan Ruak,” dehan Francisco Mausoro ba Jornalista sira iha Peace Coffee Audian, Sesta (17/11/2017).

Nia dehan ba esforsu neebe maka husi parte Prezidente Republika halo nee nudar inisiativa diak, hodi garantia estabilidade governativa. Nia hatutan tenke iha sertasaun politika neebe maka diak, atu nunee bele fo apoiu ba governu neebe maka lao dadaun.

Hatan ba karta neebe maka husi  Prezidente Partidu CNRT Xanana Gusmao manda ba iha  Xefe Estadu, Jornalista sira konfirma ba iha Xefe Kaza Sivil Prezidensia Republika Francisco de Vas Conseilhos, maibe lakonsege tamba Xefe Kaza Sivil Preokupa ho servisu seluk. 

Natalino Costa | Suara Timor Lorosae