Mari Alkatiri sei hatene iha Austrália eventual apoiu ba patrulla tasi nian

Primeiru-ministru timoroan Mari Alkatiri vizita semana ne'e baze naval ida iha Perth, iha Austrália, hodi hatene ró ida ne'ebé Governu australianu bele disponibiliza hodi nune'e Timor-Leste bele hametin nia kapasidade patrullamentu tasi nian.

"Hanesan importante ba Timor-Leste esplora posibilidade tomak hodi defende nia rekursu sira no nia soberania nasional", primeiru-ministru hatete ba jornalista sira, iha loron-kuarta, bainhira sai hosi Díli ba Austrália ba vizita durante loron tolu.

Deslokasaun ba Baze Naval Henderson hala'o iha ámbitu hosi Mari Alkatiri nian vizita, ne'ebé akompaña hosi ministru sira Estadu nian Agio Pereira ho Estanislau da Silva, iha Perth, hodi hatán ba konviti hosi ministru Finansa australianu Mathias Cormann.

Pontu importante hosi vizita, ne'ebé hala'o entre loron-kinta to'o loron-domingu, maka partisipasaun iha Asia Pacific Regional Conference ne'ebé nia abertura ofisial sei intervensaun hosi Alkatiri no mós nia homólogu australianu, Malcolm Turnbull, no hosi prezidente alemaun Frank-Walter Steinmeier.

Alkatiri esplika katak iha nia esplikasaun nia fó koñese ba delegadu rihun resin - entre líder polítiku sira, emprezarial sira no espesialista sira hosi nasaun oioin - oportunidade sira investimentu nian iha área sira gás, petróleu, turizmu ho agrikultura iha Timor-Leste.

"Ha'u nia partisipasaun iha konferénsia ne'e hatudu konfiansa iha Governu konstitusional dahitu no indika importánsia Timor-Leste nian iha rejiaun ne'e", Alkatiri hatutan.

Durante vizita, Alkatiri sei halo mós enkontru bilateral sira ho prezidente alemaun, ho primeiru-ministru no ministru Finansa australianu, ho ministru Negósiu Estranjeiru Singapura nian no ho prezidente sira hosi Woodside Petroleum e da Conoco Philips, no seluk tan.

Konferénsia Rejional hosi Ázia-Pasífiku (APRC, iha sigla inglés) hakarak analiza oportunidade foun sira investimentu ho komérsiu nian entre Austrália ho Alemaña no mós hosi nasaun rua iha rejiaun Ázia ho Pasífiku nian.

Tema ida iha diálogu ne'e maka inísiu hosi negosiasaun sira, iha tinan ne'e nia rohan, hodi hakotu akordu boot ida hosi komérsiu livre entre UE ho Austrália.

Debate kona-ba Xina, Japaun ho Koreia, no Ázia ho Pasífiku halo parte hosi ajenda boot serbisu nian, ne'ebé inklui painel sira kona-ba futuru hosi akordu sira komérsiu livre nian iha rejiaun, atividade mineira, siberseguransa, sidade sira ho mobilidade, enerjia, inovasaun, agroindústria, investimentu ho kontestu jeopolítiku iha rejiaun.

Líder sira hosi empreza oioin ho dimensaun médiu no dimensaun boot, investidor sira ho espesialista sira sei analiza tema sira iha sesaun paralela sira ne'ebé hala'o to'o loron-domingu.

Ba Andrew Mackenzie, diretor ezekutivu hosi BHP no prezidente hosi German-Australian Chamber of Industry and Commerce, anfitriaun ida hosi enkontru, ne'e hanesan "oportunidade úniku ida ba empreza sira, governu sira no líder sira seluk hodi apoia kresimentu ekonómiku no parseria rejional sira".

"Hamutuk ita bele estuda potensial boot hosi komérsiu no investimentu ne'ebé maka ita nia rejiaun oferese", nia hatutan iha aprezentasaun ida hosi enkontru ne'e.

SAPO TL ho Lusa