Opozisaun timoroan hakarak demiti prezidente Parlamentu Nasional

Opozisaun maioritáriu timoroan husu ona iha loron-segunda ne'e demisaun hosi prezidente Parlamentu Nasional nian, ne'ebé sira akuza katak hanesan "Laiha kapasidade jestaun, hamosu komplikasaun" ba instituisaun no buka krizi institusional ida hodi obriga halo eleisaun antesipadu.

"Prezidente Parlamentu Nasional hamosu komplikasaun ba funsionamentu normal hosi órgaun soberania ne'e hodi kria kondisaun nesesáriu sira hodi hamosu krizi institusional todan ida", refere hosi textu ida ne'ebé maka Lusa iha asesu.

Sira konsidera katak asaun ne'e hakarak halo atu Prezidente Timor-Leste "ho poder bele sobu Parlamentu Nasional no posibilita realizasaun antesipadu ba eleisaun lejislativu sira ne'ebé dezeja de'it hosi Governu konstitusional dahitu no hosi partidu polítiku sira ne'ebé apoia Governu no ne'ebé la serve ba interese nasional".

Iha proposta, opozisaun hatete mós katak Aniceto Guterres Lopes la defende "dignidade" parlamentu nian, mantén "postura ne'ebé laiha asaun" bainhira la "notifika ka la rejeita" deklarasaun sira hosi membru sira Governu.

Iha konkretu, opozisaun aponta ba asaun ne'ebé sira hatete hanesan "insultu" hosi primeiru-ministru, Mari Alkatiri, ne'ebé refere ba deputadu sira hanesan "labarik malkriadu sira" no ba komentáriu sira hosi ministru Defeza ho Seguransa nian, José Somotxo.

Tuir opozisaun, prezidente Parlamentu "hatudu inkapasidade hosi jestaun no kontrolu hosi serbisu administrativu sira" no rekursu humanu parlamentar sira.

Textu ne'ebé iha data loron-segunda ne'e, maibé aprezenta ona ba prezidénsia Parlamentu Nasional iha loron-sesta, asina hosi deputadu na'in 12 entre deputadu na'in 35 hosi forsa tolu opozisaun nian, Congresso Nacional da Reconstrução Timorense (CNRT), Partidu Libertasaun Popular (PLP) ho Kmanek Haburas Unidade Nacional Timor Oan (KHUNTO).

Iha dokumentu ho pájina rua, opozisaun kritika mós prezidente parlamentu tanba "lakohi konvense" Prezidente timoroan hodi "halo revizaun no muda" nia "ezersísiu extemporáneu" hosi veto polítiku ida ba Lei Poder Lokal no Desentralizasaun Administrativu no ba Lei Eleitoral Munisipal.

Ba opozisaun, ne'e hatudu "inkapasidade ida hodi defende kompeténsia lejislativu Parlamentu Nasional nian".

Opozisaun akuza Aniceto Lopes hodi viola regra rejimental sira no viola direitu hosi asesu Parlamentu Nasional nian ba informasaun nesesáriu ba deliberasaun konsiente ida tanba admiti tiha tramitasaun hosi proposta orsamentu retifikativu bainhira falta "hatudu motivu sira" ne'ebé adekuadu.

Opozisaun aprezenta ona iha loron 20 Novembru liubá proposta sensura ida hasoru Governu no rekursu ida hasoru desizaun tramitasaun orsamentu nian, textu sira ne'ebé maka seidauk iha loron debate nian iha plenáriu.

Opozisaun hatete katak ne'e hatudu katak prezidente "la kumpri deve imparsialidade nian ne'ebé maka nia sujeitu", nune'e, la hanesan ho garantia sira ne'ebé nia fó, konvoka ona to'o loron 01 Dezembru konferénsia ida hosi líder sira bankada sira nian hodi ajenda debate ba dokumentu rua ne'e.

Aniceto Guterres, ne'ebé ulu hanesan líder hosi bankada Fretilin, eleitu ona ba prezidénsia Parlamentu nian ho marjen mínimu votu ida nian - 33 kontra 32 - iha momentu ne'ebé maka halo hela negosiasaun sira hodi harii Governu.

Votu ne'e akontese liutiha loron rua hafoin Fretilin asina tiha akordu entendimentu ida ho PD no ho KHUNTO hodi harii Governu koligasaun ida nian.

Iha parte ikus negosiasaun nian, KHUNTO husik akordu no fila ba opozisaun hodi nune'e maka kontrola fatin maioria hosi Parlamentu (fatin 35 hosi fatin 65).

SAPO TL ho Lusa