Simu Sansaun, Kuandu Laimplementa Salariu 13

DILI - Governu liuhusi Sekretariu Estadu Juventude no Traballu (SEJT) sei fo sansaun ba kompana sira neebe laimplementa salariu fulan 13 ba traballador sira, maka kompana refere tenke kumpri lei traballu neebe establese ona iha rai laran.

“Ami sei fo sansaun ba kompana sira, maibe nee depende ba regras tanba ba traballador sira neebe foin tama fulan ida nee labele hetan lai, maibe ida neebe servisu tinan barak ona tenke iha,”dehan Sekretariu Estadu Nivio Magalhães ba jornalista Sesta (22/12/2017) iha nia knaar fatin Kaikoli.

Nia mos hatutan, sei haree didiak, tanba kompana sira nia politika iha lei traballu iha buat balun neebe koalia iha neeba, no kompana neebe deit tenke halo tuir lei traballu labele mai halo fali nia lei foun no hanesan Timor tenke hakruuk ba lei neebe vigora ona.

Tuir nia katak, kompana neebe laimplmenta salariu 13 nee sira se haree ida nee, liu husi sira nia diresaun atu buka hatene karik iha sei bolu sira para atu buka hatene husi sira nia razaun tanba saida mak laimplementa.

Aleinde nee Sekretariu Estadu nee informa kona-ba kompana balun neebe komesa hapara ona sira nia traballador sira, maibe husi sira nia parte seidauk simu infomasaun ka keisa ruma.

“Buat balun neebe hau hakarak hatoo mak parte governu iha komprimisiu atu servisu hamutuk ho sindikatu nunee buka rezolve problema sira neebe akontese iha fatin servisu sira nian,”nia hatutan, ida nee signifika katak sindikatu sira lamesak no governu iha atu halo ligasaun ho sindikatu no mos empregador sira sekarik iha problema bele buka solusaun ba problema sira neebe iha tuir nia dalan.

“Ba kompana sira neebe hapara ona traballador nee ita persiza hatene uluk lai nia razaun ida nee ami presiza buka hatene ami seidauk simu informasaun katak kompana balun atu hapara trabllador sira,”tenik nia.

Maibe iha kompana balun neebe hapara ona nia traballador sira mak sira bele mai halo keisa ba parte diresaun reasaun traballu ninian tanba governu iha kompremisiu atu servisu hamutuk ho empregador ho traballdor sira atu buka solusaun ba problema sira neebe iha. Maibe, ida nee liga mos ba orsamentu jeral tinan oin ninian, ida nee ema hotu akompana ho situasaun politika neebe iha.

Iha parte seluk Prezidente Ezekutivu FONGTIL, Arsenio Pereira hatete, ba emprezariu Timoroan sira atu labele dependensia ba projeitu estadu nian, tanba nee hakarak ka lakohi tenke selu traballdor sira laos atu hasai sira razaun situasaun politika nee ladun diak.

“Hau hanoin pagamentu tarde nee kestaun governu nian tanba kompana ho governu sira mos halo kontratu tanba nee kompaña nain tenke ba husi direita ba projeitu refere,”tenik nia.

Labele dehan fali situasaun politika mak fo fali implikasaun hodi hapara traballador sira, tanba kestaun politika la fo infulensia ba rai laran. 

Madalena Horta | Suara Timor Lorosae