Hakraik Aan-Buka Malu, Sai Solusaun Hakotu Inserteza Politika

DILI – Oras nee inserteza politika sai preokupasaun ba publiku, atu hakotu inserteza politika, presiza hakraik aan, buka malu, rona no perdua malu.

Liahirak nee hatoo husi Xefe Bankada PD Maria Teresa da Silva katak, atu hetan solusaun diak ba dinamika politika nee mak presiza hakraik aan, liu-liu ba maun boot fundador estadu sira atu hakraik aan ba malu, perdua aan rasik no perdua sira seluk.

“PD nia pozisaun presiza perdua rona malu, simu malu, no hakraik aan ba malu hodi hakotu inserteza politika neebe mak iha hodi haree dezenvolvimentu ba povu no nasaun,” katak Teresa ba STL Tersa (16/01/2018) iha PN Bankada PD.

Opozisaun ho kooligasaun duun malu los no sala, oinsa loos solusaun ba inserteza politika nee Teresa hatete, nee dinamika furak, iha tinan hirak liu ba buat hotu lao normal, maibe ba mandatu agora kooligasaun-opozisaun ida-idak defende nia pozisaun no razaun nee parte parte pozitivu no mos negativu.

Iha parte seluk Prezidente Ezekutivu Fundasaun Cristal Agustinho dos Santos Gonsalves hatete, inserteza politika agora nee laiha impaktu ba sira nia atividade aprendizajen. Maibe atu hetan solusaun ba inserteza politika nee presiza reza hodi bele hetan solusaun, tanba tempu defisil hotu-hotu hamutuk hetan Independensia, tanba sa agora labele?

Entretantu iha parte seluk Amu Bispu Dioseze Dili Dom Virgilio do Carmo da Silva SDB,  hatete, haree ba politika neebe mak lao kabe ona ba Prezidente Republika atu foti desizaun, neebe fiar katak PR nia desizaun ema hotu sei lao tuir, nudar ema sarani rona no halo tuir desizaun PR nian. 

Guilhermina Franco/Jacinta Sequeira | Suara Timor Lorosae