TR Hein Karta Provedénsia Cautelar Hosi PPN

DILI, (TATOLI) - Prezidente Tribunál Rekursu, Deolindo dos Santos hateten Tribunál Rekursu sei hein rekursu Providénsia Cautelar hosi Prezidente Parlamentu Nasionál (PPN), Aniceto Lopez Guterres ne’ebé Tribunál Distritál Dili, deside tiha ona foin lalais ne’e.

“Prosesu ba Prezidente PN nia karta Providénsia Cautelar ne´ebé hato´o ba iha Tribunál Distritál Dili sei la´o hela no sei to´o iha Tribunál Rekursu hodi haree ninia legalidade,” Deolindo hato´o informasaun ne´e ba jornalista sira iha Palásiu Prezidente Nicolau Lobato, Bairru Pité, Dili, segunda ne´e, hafoin hala´o enkontru ho Prezidente Repúblika, Francisco Guterres Lú Olo.

Maibé, nia dehan, nia labele emite antisipadamente ninia opiniaun kona-ba ida ne´e tanba lei la permite no ida seluk maka pedidu Prezidente Parlamentu Nasionál nian kona-ba fiskalizasaun ba artigu 15 Rejimentu Parlamentu Nasionál nian ne´ebé Tribunál Rekursu rasik hasai nia desizaun ona no ne´e notifika Prezidente Parlamentu rasik no parte sira seluk.

“Kona-ba konteúdu hosi desizaun ne´e rasik, ita-boot sira bele lee iha desizaun ne´ebé sai tiha ona iha Jornál Repúblika. Ha´u rasik mós hola parte iha desizaun ne´e, tan ne´e ha´u labele emiti ha´u nia opiniaun ba buat ne´ebé hakerek iha ne´ebá tanba lei la permite,” nia dehan.

Kona-ba fiskalizasaun ba artigu 15 Rejimentu Parlamentu Nasionál, antes ne´e Tribunál Rekursu foti ona desizaun katak PPN nia pedidu ne´e inkonstitusionál, tan ne´e Tribunál Rekursu husu atu ajenda Mosaun Destituisaun iha plenária atu deside.

Relasiona ho enkontru Prezidente Repúblika, Deolindo haktuir, nia hato´o ba Xefe Estadu kona-ba serbisu Tribunál nian no relata katak serbisu Tribunál nian hahú hosi Primeira Instánsia (Tribunál Distritál) to´o iha Tribunál Rekursu la´o di´ak nó mós serbisu administrasaun nian ne´ebé maka apoiu ba serbisu tékniku nian mós la´o di´ak hotu.

Jornalista: Xisto Freitas | Editór: Manuel Pinto