Hakarak Dada Tempu, PN Kontinua Laiha Plenaria

DILI – Parlamentu Nasional kontinua laiha plenaria, tanba Bankada Opozisaun konsidera Prezidente Parlamentu Nasional (PPN) mak hakarak dada tempu.

Kestaun nee hatoo husi Xefe Bankada PLP Fidelis Magalhaes katak desizaun neebe mak P-PN hola nee klaru ona laiha plenaria. Tanba iha enkontru lider bankada iha semana kotuk, P-PN dehan laiha tan plenaria, so dia 31 mak iha plenaria hodi halo deskute ba mosaun.

Haree plenaria laiha nee, PPN dada tempu atu hodi halai ba eleisaun antisipada Fidelis hatete, motivu PPN nian dada tempu nee atu halai duni ba ida nee, maibe ita hein deit mak haree,” katak nia ba Jornalista Segunda (15/01/2018) iha PN.

Nia hatete, rejimentu PN nian, segunda-Tersa sesaun plenaria lao iha PN, maibe durante nee laiha plenaria, tanba P-PN dehan laiha ajenda, Maibe sei iha proposta 2 neebe mak opozisaun hatama, hanesan mosaun ho destituisaun.

Kona ba destituisaun nee PPN dehan sei hein desizaun final husi tribunal, maibe rezutadu husi tribunal sai ona. Nunee mos kona ba mosaun sensura nee meius konstitusional, governu responde ba PR no PN, maibe PN halo hodi fo tempu ba governu hodi deside rasik tempu atu mai.

Iha fatin hanesan Xefe Bankada PD Maria Teresa da Silva hatete, semana nee seidauk iha plenaria tanba seidauk iha ajenda, so iha ajenda unika mak mosaun no destituisaun, aleinde nee mos governu sei aprezenta fila fali nia programa ba segundu ves. 

Guilhermina Franco | Suara Timor Lorosae