Posivelmente Jornalista Sira Bele Vota Ambulante

DILI, (TATOLI) – Prezidente Konsellu Imprensa (KI), Virgilio Guterres, hateten Eleisaun Antesipada (EA) ne’ebé atu akontese dadaun, posivelmente jornalista sira bele tuir eleisaun iha fatin ne’ebé sira halo kobertura tanba KI halo esforsu hodi komunika ba governu atu haree asuntu ne’e.

“Konsellu Imprensa atu halo komunikasaun ho governu atu haree katak Eleisaun Antesipada (EA) bele koloka artigu balun kona-ba vota ambulante jornalista sira atu bele ezerse direitu iha kualker fatin ne’ebé hakna’ar-án”, Prezidente KI, Virgilio Guterres, ba jornalista sira iha Fundasaun Oriente, sesta (16/2).

Nune’e, eleisaun lejislativa tinan kotuk, nia dehan la konsege atinje objetivu ne’e mezmu esforsu maibé tempu badak la konsege produz baze legál kona-ba vota ambulante ba jornalista sira, entaun KI propoen katak presizamente jornalista sira ne’ebé halo kobertura iha períodu eleisaun sira mós bele ezerse direitu votu iha sentru votasaun ne’ebé sira destakadu.

“Ita seidauk garantia katak atu susesu maibé KI kontinua esforsu-án atu governu, Sekretariadu Tékniku Administrasaun Eleitorál (STAE) no Komisaun Nasionál Eleisaun (CNE-sigla portugés) atu haree aspeitu ne’e.

Entretantu, KI aproveita posibilidade atu enkaiza hanoin hirak ne’e atu bele hamosu diploma foun ruma atu posivelmente jornalista sira bele vota ho meiu ambulante.

Jornalista: Zezito Silva | Editora: Rita Almeida

Imajen: Prezidente Konsellu Imprensa, Virgilio Guterres.