Governu Promete Fó Dignu ba Komunidade iha Tasitolu

DILI: VII Governu Konstitusionál identifika ona rai iha parte Golgota aréa Komoro nian hodi loke bairu foun ba komunidade afeitadu aldeia 12 Outubro Tasitolu.

Vise Ministru do Dezenvolvimetu ba Habitasaun Ordienamentu ho Ambiente, Abrão dos Santos Oliveira hatete, Governu sei hasai komunidade iha Tasitolu ho dignu, ne’e duni tenki prepara kondisaun.

Governu promote hadia kondisaun uma ho dignu, bainhira konstrusaun pelican paradise ne’e hahú ona.

“Ita nia ema sira ne’ebé mak kona rézenerasaun ne’e tenki trata ho dignu, ne’e duni antes ami sei kordena malu ho sira halo didiak, kria fatin ba sira ho dignu no garantia sira nia futuru atu nune’e sira labele vitima,”dehan Abrão ba jornalista sira iha nia knaar fatin Mandarin Dili, kinta (15/2).

Aliende loke bairru foun, Governu mós promote fó fasilidade seguransa no tratamentu ho di’ak nune’e komunidade afeitadu sira bele koloka iha bairru foun ne’ebé identifikadu.

Tanba Governu lakohi povu iha nasaun ne’e sai vitima ba dezenvolvimentu ho mega projetu ne’e.

Antes ne’e, komunidade Aldeia 12 Outubru,suku Tasitolu, Postu administrative Dom Aleixo, Munisípiu Dili preokupa konstrusaun otél pelican paradise ne’ebé halo maibé laiha diálogu.

Maski, konstrusaun ne’e hahú ona, maibé parte Governu la halo diálogu ho komunidade sira antes konstrui pelican paradise iha area tasitolu.  

“Ami ezije governu atu muda ami tenke kria fatin no kondisaun di’ak mak foin ami muda,” dehan nia.

Artur da Luz | Independente