Veteranu Sira Austrália Sei Partisipa Loron Nasionál Veteranu Sira TL

DILI, (TATOLI) – Loron Nasionál veteranu sira Timor-Leste sei selebra iha 3 marsu no sei partisipa hosi militár reformadu hosi nasaun viziñu Austrália.

“Ami mai informa preparasaun ba komemorasaun loron nasionál veteranu sira nian ne’ebé sei monu iha 3 Marsu ba Primeiru-Ministru, Marí Alkatiri, no sei hetan prezensa hosi veteranu sira Austrália nian”, Ministra Solidariedade no Sosiál, Florentina Smith, ba jornalista sira hafoin hasoru malu ho Xefe Governu iha Palásiu Governu, kuarta (21/2).

Loron komemorativu ne’e iha programa importante mak oinsá atu fó hanoin hikas fila fali sakrifísiu veteranu sira nian iha luta libertasaun nasionál tanba ne’e 3 marsu deside ona sai loron nasionál veteranu sira nian no programa tuir mai sei iha semináriu ida.

“Ami ohin konsulta ona Xefe Governu, Marí Alkatiri, no nia aseita ona hosi programa hirak ne’ebé ami hato’o”, dehan nia.

Selebrasaun loron nasionál veteranu sei hala’o iha Sentru Konvensaun Díli (CCD-sigla portugés) no sei halo atividade prinsipál mak sei halo lansamentu ba asinatura plaka.

Tema hosi komemorasaun loron nasionál veteranu sira nian mak “Komemorasaun Loron Nasionál Veteranu sira” tópiku ne’e la halo únika tanba foku de’it ba loron selebrasaun 3 marsu.

Sei marka prezensa iha selebrasaun ne’e mak sei konvida reprezentante balun veteranu sira iha Timor-Leste laran tomak, membru governu, membru parlamentu no entidade sira seluk.

Jornalista: Zezito Silva | Editora: Rita Almeida

Imajen: Ministra Solidaridade no Sosiál, Florentina Smith ho Sekretáriu Estadu asuntu Veteranu Sira, Andre da Costa Belo L4, hasoru Primeiru-Ministru, Marí Alkatiri, iha Palásiu Governu, ohin. Foto GPM/Samuel Soares