Fronteira Marítima Kestaun Nasionál, Labele Partidariza

DILI, (TATOLI) - Xefe Estadu Maiór FALINTIL-Forsa Defeza Timor-Leste (F-FDTL), Major Jenerál Leste Anan Timur konsidera katak asuntu Fronteira Marítima ne’e kestaun nasionál, tanba ne’e labele partidariza.

“Sentimentu laiha no oportunista maka partidariza asuntu nasionál. Uluk ami halo funu hodi manán independénsia ne’e la’ós ba ami de’it. Se ami hakarak ida ne’e, ema ida sei la ba tuur iha Governu. Husik ami de’it maka iha ne’ebá, maibé la’ós ida ne’e maka ami hakarak,”  Lere hato’o asuntu ne’e ba jornalista sira iha Palásiu Prezidente Nicolau Lobato, Bairru Pité, Dili, kuarta ne’e, bainhira hatán polémika kona-ba iha indísiu grupu balun partidariza asuntu Fronteira Marítima.

Nia esplika katak Fronteira Marítima ne’e povu Timor ninian no lider Xanana Gusmão ne’ebé ba trata Fronteira Marítima ne’e hanesan líder nasionál, la’ós lider partidu.

“Só ema la normal ka ema alfabetu de’it maka bele fiar bainhira partidu ruma rekere iha kampaña katak asuntu Fronteira Marítima ne’e hola parte ba sira nia susesu,” Lere realsa.

Tuir nia katak povu ne’ebé matenek sei la fiar propaganda ida ne’e tanba asuntu refere (Fronteira Marítima) ne’e povu Timor tomak nian.

“Serteza katak prosesu ida ne’e ema ida maka lidera, maibé la signifika katak pertense ba ema ida, grupu ida no partidu ida maibé pertense ba timoroan tomak,” nia subliña.

Jornalista: Xisto Freitas | Editór: Manuel Pinto

Imkajen: Xefe Estadu Maiór FALINTIL-Forsa Defeza Timor-Leste (F-FDTL), Major Jenerál Leste Anan Timur