DILI, (TATOLI) – Ministru
Agrikultura no Peska (MAP), Estanislau Aleixo da Silva, ohin iha loron
mundiál floresta hatete dezenvolvimentu florestál ne’e nesidade iha mundu tanba
akontese mudansa klimátika maka kuda ai-horis ida kontribui ona hodi hamenus ka
hapara mudansa ne’ebé akontese daudaun.
Nune’e husu ba komunidade atu tau
matan ba ai-horis sira no bainhira tesi ai tenke kuda fali no kuandu presiza
ai-horis atu kuda maka kontaktu ho MAP para planeia oinsá mak bele kuda.
Ministru hato’o liafuan ne’e
relasiona ho loron internasionál floresta ne’ebé ba dahuluk selebra iha
loron 21 marsu 2013 bazea ba rezolusuan Organizasaun Nasaun Unida iha 28
novembru 2012. Nune’e selebra loron ne’e kada 21 marsu tinan-tinan atu fahe
kona-ba vizaun no misaun floresta no relasiona ho mudansa klimátika ne’ebé
akontese iha mundu nomós estratéjia ne’ebé mak tenke halo.
“Bainhira kuda ne’e tenke tau
matan para Bibi no Karau sira labele han. Importante ita kuda ai-horis ne’e ita
kuda ba ita-nia futuru. Ita hakarak iha rai lolon sira ne’e udan mai labele
lori tun bá mota, ita hakarak halo rai ne’e sai produtivu nafatin, ne’e duni
ha’u husu para ita hotu fó liman ba malu liuliu ita-nia agrikultór sira,
ita-nia ema sira ne’ebé moris iha foho katak buat ne’ebé iha halo ne’e ba
ita-nia rai”, Estanislau hato’o mensajen ne’e iha Otél Timór, ohin.
Tanba ne’e ba apoiu ruma ne’ebé
maka presiza konta nafatin MAP ne’ebé prontu atu fó tulun. Timor-Leste rai ida
ne’ebé nia foho lolon barak tanba ne’e tenke halo agrikultura ida ne’ebé di’ak
no kuda ai-horis para labele halo rai sira monu, mota sira labele nakonu ho
rai-henek para buat ne’ebé halo ho durasaun ne’ebé naruk atu labele halo
inundasaun.
Jornalista: Maria Auxiliadora | Editora:
Rita Almeida
Sem comentários:
Enviar um comentário