Prezidente Repúblika Hahí Profisionalizmu PNTL

DILI, (TATOLI) – Prezidente Repúblika, Francisco Guterres Lú Olo, hakarak hahí esforsu no profisionalizmu membru Polísia Nasionál Timor-Leste (PNTL) tanba lor-loron tau án iha risku laran hodi garante seguransa no moris hakmatek ba timoroan hot-hotu.

“Ami hotu hatene katak ita boot sira fó án tomak, ho haraik án no domin mak ita boot sira hala’o serbisu atu kumpri misaun fó seguransa ba hot-hotu. Dala barak ita boot sira sakrifika án, fó hakmatek ba ita nia rain no ami mós bele moris ho laran metin no hakmatek, iha ami nia hela fatin ka iha fatin ne’ebé de’it”, Xefe Estadu hato’o liuhusi ninia diskursu iha aniversáriu PNTL ba dala-18 ne’ebé hala’o iha Akademia Polísia Komoro, tersa ne’e.

Nia hateten ho laran haksolok bainhira haree PNTL la’o ba oin ho espíritu serbisu hamutuk ho populasaun no hatutan populasaun sente membru PNTL sira nia prezensa no serbisu maka’as atu serbí sidadaun hot-hotu.

Prezidente Repúblika hatutan violénsia no inseguransa sai preokupasaun boot tebe-tebes ba sidadaun no ba ukun na’in sira iha Estadu demokrátiku.

Iha tinan hirak foin liubá no iha tinan ne’e, Lú Olo haktuir númeru krime sa’e ba beibeik iha Timor-Leste, liu-liu krime hanesan violénsia fízika ka baku ema iha uma laran ka liur, violénsia seksuál, asidente viasaun no kaer karreta maibé laiha lisensa.

Hirak ne’e akontese, tuir nia tanba laiha edukasaun sívika natón no laiha oportunidade empregu barak, liu-liu ba klosan balun ne’ebé moris iha sidade laran nomós tanba problema sosiál sira seluk tan.

“Nu’udar país pós-konflitu, ita bele dehan buat sira ne’e hotu mak fó dalan ba krime sira ne’ebé kria instabilidade ba ita nia seguransa”, argumenta.

Haree ba sosiedade ne’ebé nakonu ho difikuldade oi-oin no ba mundu ida ne’ebé nakfilak-án maka’as no ba beibeik, Xefe Estadu afirma PNTL tenke iha kapasidade atu hatán ba ambiente seguransa foun ne’ebé mosu dadaun ne’e.

Nune’e mós polísia tenke iha meius atu antesipa, akompaña no haree oinsá hatán ba situasaun krime, oinsá hatán ba ameasa no risku ba ema nia seguransa no rikusoin.

“Estratéjia seguransa iha ita nia rai laran tenke hatuir Konseitu Estratéjiku ba Defeza no Seguransa Nasionál ne’ebé aprova foin lalais ne’e, hodi haklaken kompeténsias Forsa no Serbisu Seguransa nian iha ámbitu sistema Seguransa Nasionál. Bainhira presiza, Forsa Seguransa bele simu tulun hosi Forsa Defeza atu garante seguransa interna, tuir hanoin, prinsípiu komplementaridade no regra instituisaun rua nian”, tenik.

“Ha’u hakarak akompaña prosesu hadi’a no moderniza Forsa no Servisu Seguransa nian, hamutuk ho órgaun soberania sira seluk. Nune’e, ha‘u sei buka hakbit instituisaun sira seluk atu serbisu hamutuk, haforsa di’ak liután seguransa iha Timor-Leste atu ema hotu bele haree momoos liután katak ita iha duni sistema seguransa di‘ak ida”, salienta.

Atu bele hasees país hosi situasaun inseguransa, Lú Olo dehan polísia presiza iha rekursu umanu no finanseiru no presiza mós sosa ekipamentu di’ak liu no harii infra-estrutura sira ne’ebé bele hatán ba situasaun inseguransa. 

Jornalista: Xisto Freitas | Editora: Rita Almeida

Imajen: Prezidente Repúblika, Francisco Guterres Lú Olo, bainhira hato'o diskursu iha tinan PNTL ba dala 18 iha Sentru Formasaun Komoro, ohin. Foto Antonio Gonçalves