Uza Mídia Sosial Insulta Ema Tenke Kriminaliza

DILI, (TATOLI) – Vise Ministru Obras Públikas, Transporte no Komunikasaun, Inácio Morreira, hala’o enkontru ho parte kompotente hanesan Prokuradoria Jerál Repúblika (PJR), Polísia Nasionál Timor-Leste (PNTL), Konsellu Imprensa (KI), no operadór telekomunikasaun Timor Telecom, Telkomcel no Telemor, buka meius ba utente mídia sosiál hodi ko’alia aat ema.

“Foin lais ha’u halo reuniaun boot ida ho instituisaun relevante no ikus mai ami deside atu se de’it mak uza identidade falsu hodi insulta ema iha mídia sosial tenke kriminaliza”, tenik ba jornalista sira iha Palásiu Governu, ohin.

Hodi dehan, ikus mai iha parte balun mak uza mídia sosiál hanesan Facebook laiha étika ho liafuan ne’ebé mak ladun di’ak, tolok malu, trata malu, enkuantu Timor nia identidade la’ós hanesan ne’e.

“Hanesan ita hotu hatene nu’udar ema, dala ruma uza mídia sosiál ho identidade falsu ne’ebé trata malu, tolok malu no defama malu ne’ebé ladun di’ak”, katak.

Nune’e, Governante ne’e husu atu ida-idak bele konsiente no komprende atu uza mídia sosiál no importante liu mak bele fó informaasaun no komunikasaun ho loloos no di’ak no alende ne’e parte balun uza mídia sosiál hodi trata lider istóriku sira.

“Ba ita ne’ebé mak uza mídia sosiál, ita harre ba hanesan sira balun la konsiente, uza ninia identidade falsu hodi trata lider sira”, dehan tan.

Tuir nia kódiku penál iha duni dalan hodi kriminaliza maibé ne’e depende ba instituisaun kompetente sira.

“Ba oin hotu-hotu tenke hatene uza Facebook, balun hetan kapturasaun ona no hein katak nia bele rekoñese ninia án tanba nia ko’alia duni hanesan ne’e, ida ne’e mak importante liu”, afirma.

Entretantu kódigu penál TL nian la ko’alia ona kona-ba defamasaun maibé iha artigu 285 kona-ba denúnsia kalunioza. Artigu ne’e iha alinea 1) ema ne’ebé, ho meiu naran ida, iha autoridade nia oin ka publikamente, ho konxiénsia katak imputasaun ne’e falsu, denunsia ka soe suspeita katak ema ida halo krime ida, ho intensaun atu halo ema ne’e hasoru prosedimentu kriminál sei hetan pena prizaun too tinan 3 ka multa.

Alinea 2) Kuandu ajente halo imputasaun falsu kona-ba ilísitu kontra-ordenasionál ka dixiplinár, pena sei hetan atenuasaun extraordinária.

Alinea 3) Kuandu funsionáriu ne’ebé iha obrigasaun atu hala’o prosedimentu kriminál maka promove dolozamente faktu deskritu iha númeru anteriór sira pena aplikavel nia limite mínimu no másimu sei agrava datoluk ida.

Jornalista: Julia Chatarina | Editora: Rita Almeida

Imajen: Vise-Ministru Obras Públikas, Transporte no Komunikasaun, Inácio Moreira