DILI, (TATOLI) - Aliansa Mudansa
ba Progresu (AMP) kestiona makas kona-ba Komisaun Nasionál Eleisaun (CNE) nia
imparsialidade tanba delegada órgaun eleitorál akompaña hosi polisia ameasa
estrutura AMP nian iha baze kona-ba diálogu ne’ebé halo iha nia uma laran.
Estrutura AMP nian iha baze halo
diálogu iha uma hanesan ko’alia iha nia uma laran, maibé delegada CNE nian
ne’ebé akompaña ho polisia ameasa sira, enkuantu diálogu ne’e la viola lei
kuandu la halo hanesan kampaña,” afirma Vise Koordenadór Juridisaun AMP, Tiago
Sarmento liuhosi konferénsia imprensa iha Sede AMP, Bairru Grilos, ohin.
Hodi hatutan, diálogu iha uma la
viola regra eleitorál tanba militante sira AMP la uza atributu, la dahur no
hakilar hanesan baibain iha kampaña, maibé delegada CNE haruka hapara atividade
diálogu nian iha Munisípiu Suai, Same no Maliana.
Nune’e mós, kuandu partidu
Fretilín halo diálogu kalan, delegada CNE la hapara, maibé AMP halo diálogu iha
uma laran sira hapara, ne’e konsidera CNE la imparsiál.
Tuir nia, CNE bele hala’o nia
knar tuir lei, maibé tenke averigua uluk enkuantu iha keixa ruma tenke buka
hatene, los ka lae hafoin hola asaun, labele rona de’it halo asaun kedan.
AMP husu CNE atu mantein nafatin
nia imparsialidade durante hala’o supervizaun ba prosesu eleitorál.
Entretantu, membru Jurisdisaun
AMP, Carmelita Moniz akresenta, AMP mós nota atividade CNE nian la imparsiál
tanba AMP halo atividade diálogu iha uma laran ne’ebé la prienxe kritériu
kampaña nian, mezmu tipu kampaña hosi AMP nian ho Diálogu, Komísiu no Mini
Kampaña.
Nune’e, órgaun kompetente sira
tenke tau matan ba aktu hirak ne’e hodi labele halo tuir ida-idak nia hakarak,
la tuir regra eleitorál.
Jornalista: Zezito Silva | Editór:
Manuel Pinto
Imajen: Tiago Amaral Sarmento
Sem comentários:
Enviar um comentário