Líder hosi Partidu Republikanu
(PR) timoroan, João Saldanha, halo ona konta sira: bainhira manán lejislativu
antesipadu iha loron 12 Maiu sei haruka dolar millaun 400 durante tinan lima
hodi harii uma "dignu" hamutuk rihun 60 iha teritóriu tomak
Timor-Leste nian.
Iha 2017, partidu harii ona uma
dahuluk, "Uma Moris Diak", Uma Prosperidade nian, iha fatin ki'ik ida
ne'ebé besik tebes ho igreja foun iha Bekora, sentru kultu boot ida ne'ebé maka
harii daudaun iha Timor-Leste.
"Ami hakarak ajuda ema sira
ne'ebé ladún iha kapasidade hodi iha uma dignu ida, ho kuartu rua, sala ida,
dapur ho hariis-fatin, ne'ebé bele hela ema na'in lima to'o na'in neen",
nia esplika ba Lusa antes partisipa iha enkontru ki'ik ida iha resintu uma nia
oin.
Matemátika hosi projetu
"prioritáriu" hosi plataforma PR nian - hetan fatin 14 entre partidu
hamutuk 21 ne'ebé maka aprezenta iha lejislativu tinan 2017, ho votu la to'o
rihun haat (0,7%) - hanesan ladún klaru.
Uma ida nia folin maka entre
dolar rihun hitu to'o rihun sanulu, obra harii postu serbisu hitu durante fulan
tolu - no objetivu maka aumenta projetu durante lejislatura tomak.
"Bainhira ami manán eleisaun
no ami governa nasaun ne'e, ami sei harii uma rihun 12 iha Timor tomak iha
tinan ida nia laran. Iha tinan lima nia laran, planu maka harii uma rihun
60", nia esplika.
Bainhira rona konversa, ho
interese maior ka ki'ik, iha públiku ida ne'ebé maka barak liu hanesan joven,
entre militante sira, potensial eleitor sira no iha mós observador hosi
Komisaun Nasional Eleisaun nian (CNE) ne'ebé maka maka marka prezensa iha asaun
ofisial kampaña nian.
Kalendáriu kampaña hosi partidu
ho koligasaun ualu ne'ebé hanesan kandidatu ba votu aprova antes ona hodi evita
"xoke sira" hosi komísiu sira no buat hotu tenki respeita ho di'ak:
kampaña bele halo de'it, pelumenus iha dalan sira, iha oras útil sira.
Iha final loron nian, ho ona
loron ne'ebé maka'as tebes, joven balun hatais kamizola partidu nian, ho
símbolu matak no mutin hodi dekora bandeira úniku ida ne'ebé maka metin iha
ai-hun ida ne'ebé maka hela de'it ai-lolon.
João Saldanha hahú hikas
matemátika: ema na'in lima iha uma ida, uma rihun 60, hamutuk ema rihun 300
ne'ebé "bele sai hosi pobreza ba uma dignu ida. Total ne'ebé sei hetan -
iha ne'e konta sira hahú la loos oituan - tanba hatete katak "sei iha
serbisu rihun 105, durante tinan lima, iha konstrusaun".
"Durante tinan lima,
programa ne'e sei kona ema rihun 405, kiak. Bainhira ami jere programa ho
dia'k, ami sei presiza orsamentu ida hamutuk millaun 400 durante tinan
lima", nia esplika.
To'o loron sira antes kampaña
nian, PR halo hela parte hosi koligasaun konkorente ida, Frente Dezenvolvimentu
Demokrátiku (FDD) maibé iha dezentendimentu hosi hanoin sira, hosi ajenda no
proporsionalidade iha "divizaun" entre partidu lima.
"PR iha ideolojia ida hosi
sentru-direita no bainhira ami desidi hamutuk iha FDD, ha'u hakarak atu
koligasaun sai hanesan alternativu polítika ida hosi sentru-direita. Sentru-direita
hosi nasaun ne'e hanesan la organizadu, buat hotu ne'ebé akontese beibeik maka
Estadu rezolve buat hotu, problema tomak", nia esplika.
"Iha potensialidade
individual sira no hosi área privadu ne'ebé la organizadu no laiha
responsabilidade no mentalidade katak tenki uza potensial ne'e", nia
insisti.
Tanba ne'e, PR ba votu mesak, ho
esperiénsia hosi asaun eleitoral tolu ne'ebé halo ona partidu muda
"tipolojia kampaña nian", husik partidu boot sira no komísiu karuk
sira ba enkontru ki'ik sira", "ho proximidade maka'as liu".
"Ita nia kultura polítika
iha Timor-Leste hafoin independénsia la'ós sustentável. Ema hotu ba komísiu
boot ida tanba iha animasaun, iha kolega ho primu sira, mai hotu no halibur ema
rihun ida ka rihun rua. Gasta iha transporte, iha hahán, karau ida ka rua,
folin ne'ebé aas tebes, maibé iha votu hosi ema rihun rua ne'e iha de'it ema
na'in lima ka sanulu maka vota", nia esplika.
Nia hatete katak to'o ona tempu
hodi kombate "mau hais", sira ne'ebé "muda hosi partidu ida ba
partidu seluk" ne'ebé hakbesik hosi forsa polítika sira hodi promete lori
ema rihun lima ka rihun neen, "sira ne'ebé husu osan no hafoin ne'e lakon:
no ne gasta de'it dolar atus lima ka rihun resin".
"Tanba ne'e, ho osan oituan
ne'ebé ami agora iha, ami desidi halo fundu kréditu baratu ida. Ema sira hosi
PR selu taxa ida 1% no sira ne'ebé la'ós PR selu 1,5%", nia esplika.
Eleisaun iha Timor-Leste akontese
iha loron 12 Maiu.
SAPO TL ho Lusa
Sem comentários:
Enviar um comentário