Alkatiri: Labele taka GAM iha nasaun demokrátiku

Primeiru Ministru (PM), Mari Alkatiri, hatete, iha nasaun ne’ebé adopta sistema demokratiku, Governu labele hapara no taka aktividade Grupu Arte Marsiais (GAM), tanba sira mós iha direitu atu ezisti iha Timor-Leste.

“Iha fatin hotu-hotu, nasaun no mundu ho demokrasia labele bandu GAM, maibé ita tenki iha lei, tenki fó kondisaun ba sira para dezenvolve sira-nia arte rasik, porque ne’e halo parte desportu, halo nusa maka bandu desportu ida ne’e,” PM ba jornalista sira hafoin remata enkontru semanal ho Prezidente Repúblika (PR), Francisco Guterres “Lú Olo”, iha Palasiu Prezidensial, Bairo Píte, Díli, Tersa, (24-04-2018).

Nia esplika, laiha lojika Governu taka GAM iha nasaun demokrátiku, tanba GAM hola parte mós iha area desportu ninian.

“Laiha lojika taka atividade GAM, sé buat ruma sala, ita kurizi la’os bandu GAM, la’os tau sira ba ilegal hotu,” subliña Mari Alkatiri.

Entretantu tuir Ministru Defeza no Seguransa (MDS), José Agostinho Sequeira “Somotxo” hateten, GAM sira presiza lei ida ne’ebé maka forti, hodi regula sira-nia atividade, tanba ezistensia GAM ne’e sai hanesan autodefeza no atividade desportivu.

“Uluk kedas ha’u seidauk sai MDS mós ha’u deskontenti ho desizaun taka arte marsiais ne’e, agora iha rai ida ne’ebé maka hanesan inisiativa no liberdade balun ita impede. Saida maka falta iha rai ida ne’e maka lei hanesan biblia ba organizasaun sira para sira kaer hodi halo ninia estatutu, ne’e para sira mós hetan respeitu, mais imi hotu hatene katak dau-daun ne’e polisia ulun fatuk moras, tanba polisia kaer membru GAM ida, la kleur husik fali, tanba ida ne’e maka sai materia kampaña FRETILIN ninian,” informa Somotxo.

Nia hatutan, aban bainrua tenki halo lei hodi regula atividade GAM, sé laiha lei reativa mós aban bainrua mosu problema nafatin.

Entretantu antes ne’e, eis PR, Taur Matan Ruak iha loron 12 Abril 2017, promulga ona lei númeru 5/2017 de 19 de Abril Regime Jurídico Relativo à Prática de Arte Marciais, Rituais, Armas Brancas, Rama Ambon e Quinta Alteração ao Código Penal no liu husi rezolusaun númeru 16/2013 taka arte-marsiais tolu (3), hanesan Persaudaraan Setia Hati Terate (PSHT), Ikatan Keluarga Silat Putra Timor-Leste (IKS-PTL “Kera Sakti) ho Kmanek Oan Rai Klaran (KORK). Vês

GMN TV | Grupo Média Nacional