quinta-feira, 19 de abril de 2018

Eleisaun: UE apoia formasaun hosi observador timoroan atus resin


Uniaun Europeia apoia hela formasaun ba observador ho monitor eleitoral timoroan sira hamutuk atus resin hodi akompaña eleisaun lejislativu antesipadu iha 12 Maiu, ne'ebé sei destaka espesialista europeu na'in rua.

Embaixador UE nian iha Díli, Alexandre Leitão, esplika ona ba Lusa katak objetivu maka "aproveita liña orsamentu sira ne'ebé iha hodi akompaña prosesu apropriasaun nian, hosi ema timoroan sira, hosi buat tomak ne'ebé iha relasaun ho eleisaun sira".

"Hanesan ho tinan 2017 sira bele hala'o mesak ona eleisaun sira nune'e bele sai mós hanesan ator prinsipal sira ba observasaun eleitoral no hosi monitorizasaun tuir rekomendasaun sira ne'ebé hetan hosi observasaun iha períudu ne'ebé halo parte eleisaun sira", nia hatete.

Iha ámbitu ne'e, UE apoia diretamente Provedoria hosi Direitu Ema nian ho Justisa (PDHJ) no mós Observador sira hosi ONG oioin timoroan sira nian iha sira nia esforsu ba monitorizasaun ho akompañamentu eleitoral no pós-eleitoral nian.

Iha konkretu, misaun europeia asina ona pakote apoiu ida ho folin euro rihun 74 ne'ebé sei permiti selu despeza balun hosi PDHJ ho monitorizasaun eleitoral no forma observador ho monitor hamutuk na'in 48.

Hala'o mós prosesu formasaun ida ba observador na'in 60 resin hosi ONG timoroan sira nian.

Iha Timor-Leste iha ona espesialista europeu na'in rua, analista jurídiku Aida Lagergren (ne'ebé marka ona prezensa iha nasaun iha tinan 2007 hodi serbisu iha Komisaun Nasional Eleisaun [CNE]) ho analista eleitoral Xavier Meilan, ne'ebé sai ona hanesan "númeru daruak" hosi misaun observasaun boot ne'ebé maka UE halo iha Timor-Leste iha tinan liubá.

Iha loron-kuarta ne'e, espesialista na'in rua hasoru malu ona ho diretor-jeral hosi Sekretariadu Tékniku ba Administrasaun Eleitoral (STAE), Acilino Manuel Branco, hodi halo kontaktu oioin ho interveniente sira iha prosesu.

"Orsamentu europeu la kalkula tinan ne'e ba realizasaun hosi eleisaun sira iha Timor-Leste, nune'e halo ami laiha posibilidade hodi haruka misaun ida ho dimensaun hanesan iha tinan anterior sira", afirma hosi Alexandre Leitão.

"Nune'e maka ami hili hodi aposta iha kapasitasaun", nia hatutan.

Kampaña ba lejislativu antesipadu hala'o to'o loron 09 Maiu no urna sira sei loke hosi tuku 07:00 to'o tuku 15:00 iha loron 12 Maiu.

SAPO TL ho Lusa

Sem comentários: