quinta-feira, 19 de abril de 2018

PDHJ Identifika Funsionáriu Balun Sai Portavós Kampaíña EA

DILI, (TATOLI) - Provedór Direitus Umanus no Justisa (PDHJ), deteta durante semana ida kampaíña eleitorál, ba Eleisaun Antisipada (EA), identifika funsionáriu públiku balun mak sai portavós kampaíña, sein iha lisensa servisu.  

Funsionáriu hirak ne’e mai hosi ministériu sira hanesan, Ministériu Solidariedade Sosiál (MSS), Ministériu Públiku (MP), Ministériu Obras Públikas Transporte no Komunikasaun (MOPTK) no Ministériu Komérsiu Indústria no Ambiente (MCIA), No Envolve iha partidu Fretilin, Movimentu Dezenvolvimentu Nasionál (MDN) no Partidu Demokrátiku (PD).

“PDHJ halo ona identifikasaun, maibé dadus ne’e sei provizóriu, kuandu kampaña remata hafoin PDHJ bele hato’o relatóriu ba Ministériu Públiku atu prosesa tuir lei.” Silvério Pinto promete ba jornalista sira liuhosi Konferénsia Imprensa iha eskritóriu PDHJ, Kaikoli, ohin.

Erru seluk Partidu Fretilín ho MSD-Movimentu Sosiál Demokrata. PDHJ identifika, halo kampaña la tuir oráriu kampaíña, iha munisípiu Likisá, Manufahi, Ermera no Ainaru.

Aleinde ida ne’e, Partidu Fretilín ho tan Movimentu Sosiál Demokrata, komete violasaun regra tránzitu tanba uza patrimóniu estadu hodi halo kampaíña.

Enkuantu Movimentu Dezenvolvimentu Nasionál (MDN), Aliansa Mudansa ba Progresu (AMP) ho Frente Dezenvolvimentu Demokrátiku (FDD), utiliza fatin eskola, ho sede suku, hodi halo kampaíña.

PDHJ mós identifika, partidu sira hanesan Frente Revolusionáriu Timor-Leste Independente (Fretilín), Partidu Demokrátiku (PD), Movimentu Dezenvolvimentu Nasionál (MDN), Movimentu Sosiál Demokrata (MSD), Aliansa Mudansa ba Progresu (AMP) no Frente Dezenvolvimentu Demokrátiku (FDD), involve labarik sira iha kampaíña.

Partidu Esperansa Pátria (PEP) ho Partidu Republikanu (PR) respeita regra no la involve labarik sira iha sira nian kampaíña.

Iha fatin hanesan, Diretór komisaun Anti Korupsaun (KAK), Rosario de Araújo akresente, funsionáriu públiku sira ne’ebé uza Patrimóniu Estadu hodi ba tuir kampaña ami foti hotu ona dokumentu, hasai ona nia retratu atu bele prosesa tuir lei.

“KAK iha ona dadus tanba ne’e kuandu naran, karreta plat kuandu hatama ba baze dadus sei mosu kompletu,” nia esplika.

Entretantu identifikasaun ba erru ne’ebé akontese iha kampaíña durante semana ida resin ne’e halo hosi funsionáriu PDHJ, ema na’in 47.

Jornalista: Zezito Silva | Editór: Manuel Pinto

Sem comentários: