quinta-feira, 26 de abril de 2018

Guterres husu liután unidade iha mundu hasoru aumentu hosi konflitu ho dezigualdade

PARTILHAR

Sekretáriu-jeral ONU nian, António Guterres, husu ona iha loron-tersa ne'e ba Governu sira hosi mundu tomak hodi aumenta liután unidade hodi hatán ba aumentu hosi konflitu sira no dezigualdade sira ne'ebé maka hasoru agora daudaun.

"Ita tenki rekoñese katak, iha aspetu fundamental balun, ita nia mundu fila fali ba kotuk", Guterres hatete iha abertura hosi reuniaun asembleia-jeral ONU nian kona-ba konstrusaun no sustentasaun dame nian, ne'ebé hala'o to'o loron-kuarta iha ONU.

António Guterres rekorda katak, iha prezente, iha nasaun barak maka sofre konflitu violentu sira ne'ebé iha tempu seluk iha dékada tolu ikus ne'e no nia subliña ezisténsia hosi "númeru rekord sira" hosi ema sivil sira ne'ebé mate ka tenki husik sira nia fatin tanba funu sira.

Destaka aumentu hosi "violasaun aat sira ba direitu ema nian", sekretáriu-jeral ONU nian denunsia mós aumentu "hosi nasionalizmu, rasizmu ho xenofobia", aumentu hosi dezigualdade no diskriminasaun ne'ebé maka feto sira ho labari-feto sira hasoru.

"Buat hotu hanesan indikador katak presiza liután unidade ho valor, hodi alivia tauk hosi ema sira ne'ebé ita serve, hodi tau mundu iha dalan di'ak ida no hodi estabelese baze sira ba dame sustentável ida no dezenvolvimentu nian", nia afirma.

Prezidente hosi asembleia-jeral ONU nian, Miroslav Lajcak, defende ona nesesidade hodi mundu kompromete lalais ho "foku foun" ida ba dame.

Promotor hosi enkontru nível importante, ne'ebé hakarak avalia esforsu sira ne'ebé halo no oportunidade sira hodi reforsa serbisu ONU nian ba konstrusaun no sustentasaun dame nian, Lajcak destaka ona katak, entre ezemplu pozitivu sira ne'ebé maka hala'o daudaun, iha final hosi konflitu iha Kolómbia, ne'ebé halibur forsa sira Governu nian ba guerilla FARC nian.

Prezidente kolombianu, Juan Manuel Santos, hanesan xefe Estadu ida ne'ebé maka marka prezensa iha reuniaun loron-tersa nian, hodi hein katak ko'alia kona-ba esperiénsia hosi nia nasaun iha konstrusaun dame nian no rekonsiliasaun nian.

Portugal reprezenta iha eventu hosi sekretária Estadu hosi Negósiu Estranjeiru ho Koperasaun, Teresa Ribeiro, no Timor-Leste marka prezensa hosi líder Aliansa Mudansa ba Progresu nian (AMP) no antigu Preziente no primeiru-ministru Xanana Gusmão.

SAPO TL ho Lusa
PARTILHAR

Author: verified_user

Publicação luso-timorense sem fins lucrativos

0 comentários: