DILI, (TATOLI) - Sekretáriu
Estadu Juventude no Traballu (SEJT), Nívio Leite Magalhães, hatete Governu
Korea konfirma ona katak bainhira Timor-Leste hadi’a programa haruka
traballadór mak sei aumenta kuota atu serbisu iha país refere.
“Tanba ne’e mak selesaun ne’e mós
parte ida husi hadi’a programa ne’e atubele sai di’ak liután. Selesaun ne’e ita
halo aberta ba ema hotu tanba programa Governu nian ba povu no povu hotu iha
direitu atu sai benefisiáriu ba programa ida ne’e”, Nívio dehan iha edifísiu Unidade
Polísia Marítima (UPM) Lesidere, ohin bainhira partisipa iha teste nani
tasi ba kandidatu sira ne’ebé sei serbisu iha indústria peska nian.
Tanba ne’e liuhusi teste no
selesaun ida ne’ebé justu mak bele deside ema ida bá ka labele.
Nune’e SEJT husu ba kandidatu
serbisu-na’in sira atu prontu sai eroi ba programa ida ne’e no sei haruka
traballadór ne’ebé mak prontu hala’o sira-nia knaar. “Hamutuk ita hadi’a
programa ida ne’e, hatudu katak timoroan sira ne’ebé agora bá ne’e ho
kualidade”.
“Se ita haruka nafatin
traballadór bá Korea ne’ebé lahatene nani, ne’ebé tama tasi semana ida muta
loron hitu estraga programa ida ne’e no ida ne’e labele akontese tan tanba
ita-nia maun-alin seluk mós hakarak bá. Hanesan timoroan labele taka dalan ba
malu, ita tenke hanoin malu”.
Atubele hasoru serbisu iha
ambiente foun maka SEJT sei koordena mós ho UPM atu lori kandidatu sira bá ho
ró boot atu aprende ka’er ikan.
“Ita sei halo no hatudu ba
Governu Korea no emprega-door sira katak ida 619 ne’ebé sei tama Korea, tama ho
kualidade”.
Atu nune’e bainhira halo knaar
iha ema nia rai sei hetan tratamentu ida ne’ebé mak di’ak no dignu.
Aleinde ne’e Nívio relata katak
iha pasadu traballadór na’in-rua mak labele fila mai tanba mout iha tasi no iha
semana kotuk na’in-rua bele salva tanba hatene nani metru 100 hafoin ró ne’ebé
sira serbisu ba ahi han.
Jornalista: Maria Auxiliadora | Editór:
Manuel Pinto
Imajen: Sekretáriu Estadu
Juventude no Traballu (SEJT), Nívio Leite Magalhães
Sem comentários:
Enviar um comentário