Estudante UNITAL Halo Asaun Hasoru Universidade

DILI, (TATOLI) – Estudante Universidade Orientál Timor Lorosa’e [UNITAL], liuliu Fakuldade Enjeñaria, kuaze atus, halo asaun hasoru universidade, asaun ne’e mosu atu impede dosente sira simu saláriu, basa estudante konsidera prosesu aprendizajen la la’o efetivu, maibé dosente sira simu saláriu.

“La’ós foin mak akontese problema ida ne’e, durante ami tama iha Janeiru nia laran, prosesu aprendizajen ne’e, mestre sira abandona ami,” dehan reprezentante estudante UNITAL, Frederico António Fernandes ba jornalista sira, iha marjen demonstrasaun, iha Kampus UNITAL, Becora-Díli, loro-kraik ne’e.

“Ami hala’o asaun hasoru dosente sira, fakuldade; sira hakfodak mai simu saláriu iha fakuldade, maibé problema ne’e ami hato’o tiha ona dehan, kinta [aban] rezolve hotu tiha mak foin simu saláriu, tanba saida mak sira nonok-nonok de’it derrepente mai tama Finansa ne’e, atu simu saláriu. Ida ne’e mak estudante sira lakohi, nune’e alunu sira impede tiha,” informa tan reprezentante estudante, husi departamentu Informátika ne’e.

Estudante Frederico António Fernandes haktuir katak iha enkontru antes ne’e, sira rona desizaun husi universidade katak ohin, universidade sei rezolve sira-nia problema no promote husi universidade katak estudante sira sei hetan solusaun ba problema sira ne’ebé mak sira enfrenta, maibé, ohin dadersán, dosente sira mai hotu tiha, atu simu fali saláriu.

“Sira enkontru hotu tiha, sira halo konflitu oi tuan iha laran, pois mai atu foti saláriu. Tanba saida? Saláriu ne’e la’ós dosente sira nian, saláriu ne’e ami alunus nia osan hodi selu eskola, selu sira, tanba saida la hanorin ami, sira iha direitu saida atu simu ami-nia osan,” hateten reprezentante estudante sira hodi esplika razaun sira halo impedimentu saláriu dosente sira nian.

Bainhira problema la hetan solusaun husi universidade, sira promote katak sei kontinua hala’o asaun hasoru universidade. “Ami sei hala’o asaun kontinua, asaun pasifika, ne’ebé mak liu fali ida ne’e,” informa reprezentante estudante, Frederico António Fernandes.

Hatán ba preokupasaun ne’e, dekanu Fakuldade Enjeñaria, Arlindo Alves Mendonça rekoñese katak problema ida akontese tanba transformasaun no tranzisaun, fakuldade siénsia no téknika no siénsia rekursu naturál, hodi fó impaktu ba prosesu aprendizajen.

“Durante ne’e ha’u haree, estabelese prosesu transformasaun, tranzisaun ida ne’e, ne’e mak impaktu ba iha prosesu aprendizajen. Maibé, realidade lae! Ida ne’e impaktu mós ba dosente sira ne’ebé nia saláriu, fulan neen i hitu ona, la simu. Pois impaktu mós ba fakuldade, ida ne’e mak fó impaktu ba dosente sira abandona estudante,” nia akresenta.

Universidade sei buka solusaun ba problema estudante nian, relasiona ho dosente sira abandona estudante sira, iha atividade lesionamentu sira.

“Primeiru, ita tenke haree uluk kazu saida mak dosente sira abandona estudante? Prosesu aprendizajen foin mak komesa, prosesu aprendizajen ba semestre impar ida ne’e. Semestre impar ne’e foin mak komesa, signifika foin mak abandona fulan ida ho balun,” dehan dekanu Arlindo.

Dekanu fakuldade Enjeñária konta tuir ba jornalista sira katak estudante sira ne’ebé halo asaun horisehik ne’e no kontinua ohin, tinan kotuk mós akontese, maibé tinan kotuk nian, la’ós nia kompeténsia, tanba nia foin mak tama.

Ida halo asaun ne’e, eis-fakuldade enjeñaria, la’ós fakuldade rekursu naturál, fakuldade rekursu naturál la’o baba’in. Ba fakuldade siénsia no tékniku ne’e mak hamosu problema ida ne’e.

“Atu garante prosesu aprendizajen ne’e la’o fila fali, aban tuku sia mak ami sei halo enkontru internu, husi estrutura reitór nian, tuun to’o iha, dekanu, hodi hetan solusaun,” nia informa.

Nia mós informa katak, aban, reitór iha posibilidade, atu rezolve kazu ne’e. “Hanesan instituisaun, ami hato’o ba ami-nia superiór para atu rezolve,” nia konklui.

Iha demonstrasaun estudante nian ohin, Ajénsia TATOLI observa katak estudante sira mós aprende xave karreta reitór UNITAL, Roberto Miranda seixas, no promote sei entrega fila fali bainhira sira-nia problema ne’e hetan ona solusaun.

Jornalista: Rafy Belo | Editór : Manuel Pinto

Imajen: Estudante UNITAL Halo Asaun. Foto TATOLI: Rafy Belo