segunda-feira, 23 de abril de 2018

PR Garante sei Luta ba Edukasaun

PARTILHAR

ERMERA, (TATOLI) - Prezidente Partidu Republikanu [PR], João Saldanha ba komunidade sira iha Railako, Ermera, bainhira hala’o komísiu, iha sábadu ne’e garante katak bainhira PR hetan asentu ba iha Parlamentu sei luta ba edukasaun, liliu labarik sira ho otas eskola, hothotu tenke remata sira-nia estudu to’o nível sekundária.

“Ezekuta liuhusi programa governu nian, Ministériu Edukasaun, PR la iha osan hala’o mesak. Ita hakarak labarik ne’ebé mak ho tinan eskola, hotuhotu tenke eskola SMA, remata,” dehan prezidente PR ba komunidade sira iha Ermera.

Lider másimu PR ne’e mós garante katak bainhira hetan konfiansa, sei reprezenta povu hodi luta atu reforsa mestre no fasilidade eskola nian, hodi garante kualidade ensinu.

“Ita haree eskola estadu nian, primária, sekundária estadu, ita reforsa husi nia fasilidade eskola, reforsa ho mós mestre sira, reforsa mós ho biblioteka, livru mós ita tenke fó, labarik sira ho tinan eskola, timoroan hotu tenke eskola tinan 12. PR ninian mak ne’e,” esplika prezidente João Saldanha.

Iha sesaun husu no hatan, bainhira hatan preokupasaun komunidade nian kona-ba edukasaun TL nian, vise prezidente PR, Vicente Vias da Costa hateten katak fallansu ne’ebé edukasaun TL iha, durante ne’e, tuir nia observasaun mak jestaun no kualidade, liliu jestaun ba profesór sira.

“Ita iha edukasaun, ita la fó prioridade ba mestre sira, purezemplu la fasilita ho kondisaun ida di’ak, ne’e mak afeta ba estudante sira-nia kualidade,” akresenta vise PR, Vicente Vias.

“Ita hotu hatene katak iha Timor laran, mestre balun la’o de’it mak ba hanorin, husi dook tan. Ida ne’e governu la fasilita,” nia akresenta tan.

Vise-prezidente PR ne’e mós realsa katak bainhira PR mak hetan asentu Parlamentár, sei luta ida ne’e, para bele maneja didi’ak, fasilita didi’ak mestre sira, atu hanorin di’ak, ita-nia oan sira para bele iha kualidade.

“Kuandu kualidade ne’e di’ak ona, nia [estudante] bele serbisu iha Timor no serbisu iha rai li’ur. Ida ne’e mak programa partidu PR nian. Ne’ebé, ba ami, ita-boot sira-nia dúvida, ami sei aplika, se ita-boot sira fó fiar ba Partidu Republikanu,” nia konklui.

Enkuantu, haktuir ba plataforma eleitorál 2018, PR ninian, alende área prioridade seluk, kona-ba edukasaun, tui programa polítika PR 2018-2022 katak eskola obrigatóriu, kualidade, ho gratuitu to’o tinan 12. Tetun lian ofisiál nú. 1.

Aprende inglés atu tama ASEAN [Association of South East Asian Nation], partisipa iha komersiu globál, ho kria paz iha mundu. Eskola vokasionál ho politéknika di’ak.

Prepara joven Timor lidera Timor-Leste ho mundu liuhusi universidade ho politéknika. Prepara joven internasionál sira atu lori paz ho moris di’ak ba mundu liuhusi universidade ho politéknika.

Nune’e mós, rekrutamentu estudante foun UNTL [Universidade Nasionál Timor Lorosa’e] fó ba UNTL, la’ós Ministériu Edukasaun [ME] mak halo.

Jornalista: Rafy Belo | Editór : Manuel Pinto

Imajen: PR esplika programa ba komunidade. Foto TATOLI: Egas Cristovão
PARTILHAR

Author: verified_user

Publicação luso-timorense sem fins lucrativos

0 comentários: