segunda-feira, 23 de abril de 2018

Repúblika Popular Xina Fó Apoiu 1000 Urna Ba TL

PARTILHAR

DILI, (TATOLI) – Governu Repúblika Popular Xina liu husi embaixada, fó apoiu urna hamutuk 1000 ba governu Timor-Leste hodi uza ba realiza Eleisaun Antisipadas, iha loron 12 Maiu.

Ministru Administrasaun Estatál, Valentim Ximenes hateten ida ne’e hanesan apoiu ba dahuluk husi nasaun belun Xina.

“Apoiu ne’e primeira fez ita husu ba belun Xina, sira apoiu ita ho 1000 urna atu bele kompleta ita nia urna iha sentru votasaun hotu-hotu iha territóriu”, Valentim Ximenes tenik ba jornalista sira iha Palásiu Governu, ohin.

Tuir nia, apoiu ne’e mai iha tempu ne’ebé lais, tanba prodúz 1000 urna ne’e iha loron lima nia laran no sei uza ba sentru votasaun hotu hodi fasilita sidadaun sira ezerse sira nia votu, iha eleisaun Antisipada.

“Agora ita tenke uza urnas sira ne’e iha sentru votasaun hotu-hotu para bele fó fatin ba sidadaun eleitór atu vota livre, hodi sira deside estadu nia futuru iha urnas ne’ebé mak ita iha”, nia haktuir.

Parte seluk embaixadór Repúblika Popular Xina, Liu Hongyang hateten lori governu Xina nia naran, sira kontente bele partisipa no kontribui iha prosesu polítika iha Timor-Leste.

“Hanesan amigu, Xina sempre prontu atu fó apóiu Timor-Leste ho ninia povu bainhira presiza”, nia espresa.

Entretantu total urnas ne’ebé presiza koloka iha sentru votasaun hotu hamutuk 890 urnas no sei iha rezerva urnas karik presiza. Enkuantu urnas ne’ebé Xina ajuda agora daudaun iha prosesu transportasaun mai Timor-Leste.

Jornalista: Julia Chatarina | Editór: Manuel Pinto

Imajen: Primeiru-Ministru, Mari Alkatiri, Akompanha husi Ministru Negosiu Estranjeiru no Kooperasaun, Aurelio Guterres no Ministru Administrasaun Estatal, Valentim Ximenes hamutuk ho Embaixadór Repúblika Popular Xina, Liu Hongyang ho ninia ekipa bainhira entrega simbolikamente urnas ba Governu Timor-Leste iha Palasiu Governu. Imajen GPM/Samuel
PARTILHAR

Author: verified_user

Publicação luso-timorense sem fins lucrativos

0 comentários: