Prizoneirus 91 Prizaun Gleno sei partisipa EA

Prizoneiru nain 91 iha Prizaun Gleno, Munisipiu Ermera sei tuir votasaun iha Eleisaun Antesipada (EA) nebe sei halao iha loron 12 fulan Maiu mai.

Diretor prizaun Gleno, Nito Dos Santos hatete katak,  sira sei fo opurtunidade ba prizioneiru sira iha prizaun Gleno atu fo sira nia votus hanesan ho sidadaun seluk.

Ministeriu da Justiça e li-liu servisu prizional, ami hala’o servisu bazeia ba dekretu lei Númeru 14/2014 ne’ebé fo dalan ba prizionariu sira hanesan mos sidadaun seluk atu ezerse sira ninia direitu politika, tanba ne’e sira mos iha direitu atu partisipa iha eleisaun ne’ebé sei mai, informa Diretor Prizaun Estabelesementu Gleno, Nito Dos Santos, hafoin partisipa serimonia aniversariu PNTL ba dala-XVIII iha Munisipiu Ermera Vila, Postu Administrativu Gleno, foin lalais.

Diretor Prizaun Gleno hatutan, nia parte sei halo servisu kolaborasaun ho entidadente relevante atu fó sussesu eleisaun antesipada ne’ebé sei halao iha prizaun Gleno.

Edukasaun votantes, ami sei koordena hela ho STAE no CNE, sira seidauk fó orariu ba ami, maibe levantamentu dadus atu produs sira (Dadur) nia kartaun eleitoral ba sira ne’ebé lakon karatun eleitoral. Ami halo hela koordenasaun ida ne’e, hanesan preparasaun ida nue’e prezu sira mos bele ezerse direitu votu politiku iha eleisaun antesipada mai, dehan Nito Dos Santos.

Total prizioneiru iha prizaun Gleno Ermera nain 91, feto nain 17 no mane nain 74. Ito

GMN TV | Grupo Média Nacional