DILI, (TATOLI) - Diretór Jerál
Sekretáriu Tékniku Administrasaun Eleitorál (STAE), Acilino Manuel Branco, informa
katak iha loron 12 Abríl STAE sei fó sai rezultadu númeru eleitorál ne’ebé sei
partisipa iha Eleisaun Antisipada.
Dadus provizóriu ne’ebé oras ne’e
rejistradu iha sistema baze dadus hamutuk 790.294, kompostu hosi rai laran no
rai li’ur.
“Resenseamentu iha territóriu
nasionál no Diaspora hotu ona, maibé hein de’it atu sinkroniza hodi hetan dadus
ikus tanba dadus hosi Atauru mak ladauk to’o mai,” Diretór Jerál STAE, Acilino
Manuel Branco ba jornalista sira iha STAE, Kaikoli, Segunda (2/04).
Númeru eleitór iha rai laran sei
sinkroniza hosi Postu Administrativu Ataúru ne’ebé seidauk tama. Hosi rai liur
(Diaspora) dadus kompletu, mai hosi, Reúne Unidu ho totál eleitór hamutuk 128,
Portugal, na’in 738, Irlanda Norte 287, Korea Súl 537 no Australia 1533, enkuantu
totál eleitór iha Diaspora hamutuk 3.223.
Enkuantu, prosesu resenseamentu
no atualizasaun baze dadus iha rai laran no rai li’ur hahú iha 8 Fevereiru no
termina ona iha 28 Marsu no EA sei akontese iha 12 Maiu.
Iha eleisaun lejizlativu ne’ebé
antes ne’e realiza ona, totál eleitór iha rai laran no rai li’ur hamutuk
764.858, enkuantu eleitór feto hamutuk 369.695 no mane 395.163.
Jornalista: Zezito Silva | Editór:
Manuel Pinto
Imajen: Diretór Jerál STAE,
Acilino Manuel Branco
Sem comentários:
Enviar um comentário