terça-feira, 8 de maio de 2018

Kampaíña EA Somotxo Rekoñese Iha Insulta, Maibé La Kria Instabilidade


DILI, (TATOLI) - Ministru Defeza no Seguransa, José Agostinho Sequeira Somotxo hato’o parabéns ba populasaun no lider partidu polítiku sira ne’ebé maski hato’o linguajen insultu iha kampaña maibé la kria instabilidade grave.

“Ba forsa armada no PNTL ne’ebé durante ne’e halo esforsu maka’as hodi asegura estabilidade nasionál durante kampaña, ha’u hato’o parabéns nó mós parabéns ba órgaun komunikasaun sosiál ne’ebé hatene tetu liafuan hodi la fó impaktu ba estabilidade nasionál,” nia dehan kestaun ne’e ba jornalista sira iha Palásiu Prezidente Nicolau Lobato, Bairru Pité, Dili, tersa ne’e, hafoin levanta pontu situasaun ba Xefe Estadu, Francisco Guterres Lú Olo.

Somotxo hatutan garante estabilidade nasionál la’ós to’o de’it última kampanha maibé tenke kontinua to’o eleisaun nomós hafoin eleisaun.

Iha biban ne’e, Somotxo informa, nia lakohi responde kle’an ba akuzasaun ne’ebé hasoru nia katak nia maka haruka joven sira sunu alfándega iha krize tinan 2006.
Nia haktuir katak akuzasaun ne’e falsu tanba tinan 2006 ne’e nia sei iha Portugal no nia to’o Timor iha tinan 2007.

“Ha’u hanoin katak argumentu ne’e falsu. Maibé, ha’u mós lakohi lori sira ba tribunál. Husik povu maka julga sira iha eleisaun mai ne’e,” nia tenik.

Jornalista: Xisto Freitas | Editór : Manuel Pinto

Imajen: Ministru Defeza no Seguransa, José Agostinho Sequeira Somotxo.

Sem comentários: