quarta-feira, 30 de maio de 2018

ONU: Timor-Leste hanesan referénsia iha protesaun sosial maibé tenki iha liután atuasaun

PARTILHAR

Timor-Leste hanesan referénsia rejional ba programa sira hosi protesaun sosial ne'ebé akontese iha nasaun laran, maibé senti dezafiu importante sira iha atuasaun no efisiénsia hosi medida sira ne'e, alerta hosi kordenador rezidente hosi ONU iha loron-tersa ne'e.

"Timor-Leste hanesan referénsia ida iha rejiaun ne'e. Nasaun rekoñese direitu ba protesaun sosial iha Konstituisaun no investe iha folin maka'as ida hosi orsamentu iha programa hamutuk 26 ba protesaun sosial", nia hatete durante aprezentasaun hosi relatóriu "Dezafiu ho Rekomendasaun sira hodi Aumenta Protesaun Sosial ba Ema tomak iha Timor-Leste".

"Kuaze labarik sira iha tinan eskolar frekuenta eskola. Eletrisidade, bee ho saneamentu hahú di'ak, númeru hosi malária ho moras sira seluk hahú tuun", "maibé ita hatene katak, maski iha progresu, sei iha dezafiu barak" no "parte hosi dezafiu maka haree oinsá ita bele halo programa sira ne'ebé iha liu atuasaun no efisiente liu, hodi fó solusaun loloos ba ema sira nia moris", afirma hosi responsável ONU nian.

"Kompromisu ho protesaun sosial reflete iha dezenvolvimentu nasuan nian no programa sira ne'e halo diferensa. Pobreza iha nasaun diminui iha tinan 10 ikus ne'e", hatete hosi Roy Trivedy, kordenador rezidente hosi ONU nian no reprezentante rezidente hosi Programa ONU nian ba Dezenvolvimentu.

"Protesaun sosial hanesan direitu ida ema nian, ne'ebé iha knaar importante tebes hodi hamenus kiak no hadi'a moris di'ak hosi ema ida no família sira", subliña hosi Trivedy.

Ema katuas-ferik liu 90% hosi nasaun simu forma ida pensaun nian no apoiu sira to'o ba família sira ne'ebé iha labarik sira, ho programa sira hanesan merenda eskolar ho saúde ka edukasaun gratuitu.

Ba responsável hosi ONU ne'e hanesan importante, hanesan ezemplu, buka reforsa medida sira apoiu ba labarik ho feto isin-rua sira, haree fali orsamentu hodi hadi'a jestaun, monitorizasaun ka avaliasaun hosi programa sira ne'ebé halo daudaun.

"Ami nia dezafiu hanesan konsege fó barak ka oituan. No, hanesan klaru, buat ne'ebé maka ami tenki halo maka fó korajen ba ema sira hodi liuhosi polítika sira protesaun sosial nian, la'ós kria dependénsia, maibé hodi, neineik, sei la presiza asisténsia ne'e", nia hatete.

Florentina Smith, ministra Solidariedade Sosial, rekoñese mós dezafiu sira ne'ebé iha, nota liuliu nesesidade hodi integra programa sira ne'ebé ezisti ba estratéjia nasional úniku no integradu ida.

"Maski hosi polítika sira, sei iha dezafiu barak. Maioria hosi programa sira ne'ebé iha elabora individualmente, lahó vizaun ida ba prazu naruk, espesífiku ba área hosi protesaun sosial", Smith hatete.

Envolve instituisaun hamutuk 20 resin durante tinan rua nia laran, relatóriu ne'ebé divulga iha loron-tersa sei serve hanesan baze hodi "ajuda sistema protesaun sosial timoroan sai efisiente no efikaz liu", aumenta apoiu hosi Estadu ba sidadaun timoroan.

"Dalan importante" ida ne'ebé tenki hanesan "baze di'ak ida ba dezenvolvimentu hosi estratéjia nasional ida hosi protesaun sosial" no ba reforsu hosi aspetu sira "krítiku liu" hosi sistema, inklui reforsu institusional, konsidera mós hosi governante.

Relatóriu ne'e halo iha ámbitu hosi projetu ACTION-Portugal, ne'ebé selu hosi Gabinete Estratéjia ho Planeamentu hosi Ministériu Traballu, Solidariedade ho Seguransa Sosial Portugal nian no implementa hosi Organizasaun Internasional Traballu nian, no nia objetivu maka reforsa sistema sira protesaun sosial nian hosi Nasaun Afrikanu sira ho Lian Ofisial Portugeza ho Timor-Leste.

Relatóriu halo parte iha Estratéjia Nasional hosi Protesaun Sosial ho rezulta hosi prosesu ida hosi Diálogu Nasional ho Baze iha Avaliasaun (DNBA) ho atór relevante sira hosi Governu, parseiru sosial sira, sosiedade sivil ho ONU, ne'ebé halo iha tinan hirak ikus ne'e.
Smith ho Trivedy felisita liuliu apoiu hosi Portugal ba área protesaun sosial ne'ebé sira konsidera hanesan "importante tebes".

SAPO TL ho Lusa
PARTILHAR

Author: verified_user

Publicação luso-timorense sem fins lucrativos

0 comentários: