quinta-feira, 31 de maio de 2018

Relatóriu: Timor-Leste tenki reforsa protesaun ba feto isin-rua, labarik sira ho traballador informal sira

PARTILHAR

Reforsu hosi medida sira apoiu nian ba feto isin-rua no infánsia dahuluk, tinan ativu ho traballador sira hosi área informal hanesan reforma "prioritáriu" sira ba sistema hosi protesaun sosial iha Timor-Leste, defende hosi relatóriu ida ne'ebé divulga iha loron-tersa ne'e. 

Preparadu ho apoiu hosi Portugal no Organizasaun Internasional Serbisu nian (OIT), relatóriu aponta mós ba nesesidade hosi reforsu ida ba kapasidade institusional hosi sistema tomak, "iha nível orsamentasaun nian, jestaun, implementasaun, monitorizasaun ho avaliasaun polítika sira nian, nune'e mós oinsá halo aliñamentu ba prioridade polítika sira ho distribuisaun orsamental".

"Fatór sira ne'e hanesan importante hodi nune'e investimentu sira iha protesaun sosial bele reflete iha avansu sira iha dezenvolvimentu ema nian no iha populasaun nia moris di'ak", refere.

Ho títulu "Dezafiu ho Rekomendasaun sira hodi Aumenta Protesaun Sosial ba Ema tomak iha Timor-Leste", dokumentu hakarak identifika dezafiu atual sira ne'ebé maka nasaun hasoru iha área protesaun sosial.

Reforma prioritáriu sira, "tanba nia potensial aas iha termu impaktu nian", inklui "reforsu hosi medida sira hodi apoia dezenvolvimentu hosi Infánsia dahuluk, liuliu iha loron 1000 dahuluk moris nian, hahú iha gravidéz".

Defende mós aumentu ba protesaun ba tinan ativu, "liuliu hosi implementasaun rejimi kontributivu kompletu hosi sistema seguransa sosial nian" no hosi medida sira ne'ebé hadi'a protesaun ba traballador sira hosi área informal".

Dokumentu nota katak maski falta no susar sira, relasionadu liuliu ba falta hosi "estratéjia ida ne'ebé abranjente no kordenadu", sistema hosi protesaun sosial timoroan nian iha ona "baze di'ak ne'ebé, ho rekursu adekuadu sira no desizaun polítika ne'ebé informa ho di'ak, sei produz progresu importante sira ba estabelesimentu hosi Baze sira hosi Protesaun Sosial ba ema tomak iha Timor-Leste" no hodi hetan objetivu nasional ho internasional sira.

"Sei bele halo buat barak hodi hadi'a kapasidade institusional sira hodi jere ho di'ak, entrega, monitoriza ho avalia programa sira hosi protesaun sosial", indika.

"Timor-Leste seidauk iha Baze sira hosi Protesaun Sosial estabelesidu no bele hadi'a hodi garanti atu ema tomak iha asesu ba serbisu importante sira hosi saúde no ba seguransa hosi rendimentu iha faze tomak moris nian", refere hosi estudu.

Iha área saúde, relatóriu haree katak iha problema sira iha oferta, falta rekursu humanu no infraestrutura sira, no mós iha buka, tenki halo "esforsu sira hodi aumenta buka iha serbisu sira saúde nian" no hodi eduka populasaun "kona-ba prátika saudável sira no kona-ba importánsia hosi kuidadu sira saúde nian".

Área sira hosi saúde maternu infantil, hosi resposta ba moras krónika sira no nutrisaun ne'ebé ladi'ak, "karik, problema saúde ne'ebé krítiku liu iha Timor-Leste", hanesan prioritáriu.

Labarik sira ne'ebé seidauk to'o tinan 15, ne'ebé reprezenta besik 40% hosi populasaun nasaun nian, hanesan 55% hosi kiak sira, ho grupu entre tinan 0 to'o tinan lima hanesan sira ne'ebé maka "ladún simu investimentu sira".

Situasaun ida ne'ebé bele, iha parte balun, hetan kompesasaun, ho reforsu ida hosi programa Bolsa Inan nian no hosi Programa Merenda Eskolar.

Kona-ba seguransa hosi rendimentu sira, relatóriu haree katak "grupu balun simu ajuda jenerozu ida, maibé maioria hosi populasaun laiha ka hetan apoiu oituan".

"Maioria hosi programa sira hosi protesaun sosial ne'ebé iha hanoin hodi hatán ba situasaun sira hosi vulnerabilidade espesífiku ka aat tebes, hanesan dezastre natural sira ka violénsia jéneru nian, bainhira programa sira relasionadu ho serbisu oferese kobertura limitadu ida", refere.

Situasaun sei hahú hadi'a ho sistema kontributivu foun hosi seguransa sosial iha nasaun, ne'ebé hahú ona iha 2017, maibé la garanti kobertura ba parte barak hosi traballador sira - área informal empregu ba parte maioria - no sei demora "dékada barak hodi hetan maturidade.

Relatóriu ne'e halo iha ámbitu hosi projetu ACTION-Portugal, ne'ebé selu hosi Gabinete Estratéjia ho Planeamentu hosi Ministériu Traballu, Solidariedade ho Seguransa Sosial Portugal nian no implementa hosi Organizasaun Internasional Traballu nian, no nia objetivu maka reforsa sistema sira protesaun sosial nian hosi Nasaun Afrikanu sira ho Lian Ofisial Portugeza ho Timor-Leste.

Relatóriu halo parte iha Estratéjia Nasional hosi Protesaun Sosial ho rezulta hosi prosesu ida hosi Diálogu Nasional ho Baze iha Avaliasaun (DNBA) ho atór relevante sira hosi Governu, parseiru sosial sira, sosiedade sivil ho ONU, ne'ebé halo iha tinan rua ikus ne'e.

SAPO TL ho Lusa
PARTILHAR

Author: verified_user

Publicação luso-timorense sem fins lucrativos

0 comentários: