Populasaun Oe-cusse 95% asesu ona ba eletrisidade

OE-CUSSE, (TATOLI) - Populasaun Oe-Cusse hosi suku 18, no aldeia 83 asesu ona ba eletrisidade durante oras 24 nia laran, nu’udar rezultadu progresu hosi implementasaun polítika “Zonas Especiais de Economia Sosial de Merkado” (ZEESM).

Rekoñesementu ne’e hato’o hosi  Porta Vóz Movimentu Sidadania Oe-Cusse Timor-Leste (MSOTL), Luis Armando Pina, nu’udar sinál agradesimentu ba Prezidente Autoridade  Rejiaun Administrativa Espesiál Oé-Cusse Ambenu-RAEOA-ZEEMS TL, Marí Alkatiri nia prezensa iha Rejiaun Oe-Cusse, ne’ebé konsege halo mudansa ne’ebé hodi benefisia povu Oe-Cusse.

“Molok prezensa Autoridade RAEOA-ZEEMS TL, Oe-Cusse moris iha situasaun difisil tebes hanesan eletrisidade lakan iha de’it Oe-Cusse Vila ho oras lima iha tempu kalan, maibé daudaun ne’e eletrisidade lakan durante oras 24 ba suku 18, aldeia 83 reprezenta pursentu 95 populasaun Oe-Cusse,” Pina esplika iha konferénsia imprensa ne’ebé hala’o iha Oe-Cusse, ohin.

Mudansa seluk tuir Pina mak Oe-Cusse iha ona opsaun atu hala’o movimentu ba rai boot hanesan Dili liuhosi transporte Aero, terrestre no Marítima.

“Oe-Cusse laran la izoladu hanesan tempu uluk depois konstrusaun ponte Noefefan,” nia orgullu.

Iha parte agrikultura nian, nia dehan ho prezensa ZEESM halo projetu irrigasaun Tono hodi fó benefísiu ba area natar ho ektare 1.117.

Nune’e mós grandee projetu RAEOA-ZEEMS TL bele fó servisu ba traballadór barak inklui kompañia lokál, no fó mós benefísiu ba negosiante ki’ik sira. Ezemplu povu Oe-Cusse ne’ebé kuda modo no hakiak animál mós hetan benefísiu indireta hosi programa ne’ebé mak Autoridade RAEOA -ZEEMS TL hala’o iha tinan tolu nia laran.

Ho benefísiu hirak ne’e MSOTL husu ba Prezidente RAEOA-ZEEMS TL atu aselera prosesu konstrusaun estrada hosi Noefefan-Citrana-Nitibe; Tono-Oesilo-Pasabe.

Jornalista: Zezito Silva | Editór: Manuel Pinto

Imajen: Sentrál Elétrika Inur Sakato