DILI: Forsa Armada Libertasaun
Independénsia Timor-Leste (FALINTIL) nu’udar transformasaun luta ba libertasaun
ne’ebé harii, iha 20 Agostu 1975, husi lideransa Frente Revolusionáriu
Timor-Leste Independente (FRETILIN).
FALINTIL konsege kumpre ninia misaun hodi
liberta povu no nasaun ne’e. Iha prosesu luta ema ida ne'ebé koñesidu ho
estratéjia brillante hodi ultrapasa funu maka, Eis-Comandante Em Chefe das
FALINTIL, Kay Rala Xanana Gusmão.
Ema barak mak kontribui ba
prosesu ne’e to’o ninia fim, maibé Xanana Gusmão hetan porsaun ne’ebé
diferente, tanba konsege lidera funu ne’e iha tempu ne’ebé difisil to’o ukun
rasik-aan.
Xanana sempre iha ba asuwa'in
FALINTIL sira iha tempu susar nia laran, maibé iha selebrasaun loron ne’e ba
dala XLIII, iha 20 Agostu 2018, Eis-Komandante das FALINTIL la hola parte.
Majór Jenerál FALINTIL-FDTL, Lere
Anan Timur hateten, komemorasaun ne’e importante, maski nune’e Kay Rala Xanana
Gusmão la marka prezensa sei la lori ba lia.
“Ita nia maun boot, ita nia aman
no hanesan mós komandante das FALINTIL la marka prezensa tanba dala ruma karik
tempu mak laiha, maibé konvite ami haruka ba”, dehan nia, iha Kuartél Jerál
F-FDTL, Fatuhada, horisehik.
Nune’e, nia esplika, luta na’in
lubuk ida ne’ebé la marka prezensa dala ruma sira barak hela iha área rurál
sira, balun mós laiha transporte no balun preokupa ho servisu vida agrikultura
nian.
Luta nain sira nia futuru maka
oan sira-nian, bainhira la hanoin iha futuru ema seluk maka sei konta fali luta
na’in sira nia istória, ema maka sei hela fali ho istória luta na'in sira nia.
Dala ruma luta na'in sira ne’ebé istória nia hun sai fali hanesan ema seluk ema
leet.
Ne’e duni, Lere hakarak husu ba
ukun na'in sira komesa agora halo lei ruma ba destinu veteranu siranian hodi
bele entrega ba oan sira.
Iha selebrasaun ne’e,
Instituisaun F-FDTL mós halo promosaun diviza ba ofisial superiór na’in tolu
(3) ba Tenente Koronél Manuel Freitas (Maubuti), João Pedro da Silva (Rairia)
no Higino das Neves (Fragata) nu’udar agradesimentu ba kontribuisaun luta
libertasaun nasionál, iha tinan 24 nia laran.
Asaun rekoñesimentu ne’e nu’udar
aktu ba distinsaun husi Governu no Estadu ba sira na’in tolu ne'ebé ho espíritu
nasionalizmu no patriotizmu ofrese ba nasaun.
“Sira la hasai kursu akademia ka
la'ós ema ne'ebé matenek liu, maibé hanesan aktu rekoñesimentu no valorizasaun
ba luta libertasaun nasionál de Timor-Leste ne'ebé sira ofrese ona”.
Komemorasaun loron FALINTIL ba
dala XLIII, laos atu konvida malu hodi halo divertimentu de’it hodi haluha tiha
sentidu ukun rasik-aan. Maibe presiza halo reflesaun hodi hanoin hikas hahalok
pasadau ne’ebe liu ona.
Tenke hanoin hikas prosesu ba
libertasaun nasionál, hanoin ba konsekuénsia di'ak no aat sira ne'ebé timoroan
halo iha tinan 24 nia laran. Oinsá terus ne'ebé FALINTIL sira enfrenta to’o
ikus mai barak mate no lakon.
Ne'e duni, Jenerál Lere, husu ba
funu na’in sira ne'ebé sei moris tenke tau nafatin iha ida-idak nia fuan
istória FALINTIL nian atu kontinua hatutan ba jerasaun foun sira atu keta
lakon.
“Ha’u apela ba veteranu sira
ne'ebé sei moris ita nia dignidade no valór aas liu sasán hotu-hotu”, dehan
nia.
Ema balun sei moris tanba deve
vida husi sira ne'ebé mate ona. Ohin loron veteranu barak mak kaer servisu
Estadu nian barak mak iha regalias oioin, balun sai alvu ba hahalok violénsia
oioin.
Nune’e, husu ba jerasaun patriota
sira atu kontinua luta ba futuru hodi hatutan valór no dignidade inan aman
FALINTIL sira nian.
Nu'udar jerasaun patriota tenke
hakraik-aan, buka atu hamutuk nafatin ba futuru ne'ebé di'ak para bele alkansa
mehi boot ne'ebé timoroan hotu hakarak mak unidade, pás no progresu.
“Imi tenke matan moris neon nain
nafatin hodi hateten aluta kontinua”, tenik nia.
Eis gerrilleiru ne’e husu mós ba
soldadu jerasaun foun sira atu kontinua mós doutrina FALINTIL nian tanba FDTL
mai husi FALINTIL.
Nia hatutan, espíritu FALINTIL
saída loos maka hakarak kaer metin nu’udar legadu husi asuwa'in FALINTIL ba
jerasaun ohin loron no aban bainrua mak sira nia domin ba pátria no ba povu
tomak domin ne’ebé hahú haburas husi movimentu organizadu ba ukun-rasik-an,
ne’ebé harii ho vizaun polítika luan no momoos, husi grupu Nicolau Lobato nian,
husi ASDT, iha tinan 1974.
FALINTIL ninia espíritu
sakrifísiu, brani, laran nakloke, solidariedade no fó-aan tomak ba luta
libertasaun nasionál mai husi sentimentu domin ba Povu no Pátria.
Domin ne’e mai husi sentidu
pertense ba uma kain ida de’it Timor-Leste fanun-aan ho espíritu FALINTIL
signifika hasees-aan husi interese pesoál, grupu ka partidáriu maibé tau aas
nafatin interese no domin ba Povu no Pátria.
Independente
Sem comentários:
Enviar um comentário