PNTL detein suspeitu ne’ebe mí ba ema

Polísia Nasionál Timor-Leste (PNTL), Munisípiu Díli, detein ona suspeitu nain rua iha sela detensaun Polísia, tanba mii (soe bee kiik) ba feto nain rua nia leten iha fatin públiku Colmera.

Suspeitu  nain rua ne´e ho inisial Eko Papa Serra no  Delta Bravo-Bravo, ne´ebé mak PNTL  kaptura iha área Colmera  Kinta (23/08/18) mais ou menus tuku  9 kalan oras Timor-Leste.

Suspeitu sei detein  durante oras 72 hafoin submete ba primeiru interogatoriu iha Tribunal Distrital Díli.

“Hahalok suspeitu nain rua ne´e, ne´ebé mak sempre mii bokon ema, ema atu ba misa mós sira mii bokon, hasai sira nia oin lulik depois hatudu ba ema, tanba ida ne´e sai tarjetu PNTL nian, maibe ita konsege kpatura sira ona”, esplika Segundu Komandante PNTL Munisípiu Díli Superintendente Asistente Euclides Belo ba jornalista sira Sesta (24/08/18) iha Kuartel PNTL Caicoli Díli.

Vítima sira feto nain rua mós PNTL aguarda kedas haruka  foti sira-nia identidade,  ohin (horseik) dadersan sira mai kompleta ona sira-nia auto notísia,  ne´ebé mak servisu Investigasaun  prepara hodi haruka ba Ministériu Públiku.

“Vítima barak mak fó informasaun mai ami,  maibe vítima barak la konsege identifika suspeitu tanba suspeitu sira utiliza kapaseti, entaun la konsege sira nia oin, maibe grasa a deus horikalan (horiseik-kalan) PNTL  rasik mak kaptura hetan mós apoiu husi Konsellu Polísiamentu Komunitaria   ne´ebé mak estabelese ona”, dehan Euclides Belo.

Segundu komandante PNTL ne´e  hatutan, entre  detidu nain rua  ne´e, iha nain ida mak  komete tan  krimi falsifikasaun identidade pesoal, ne´ebé mak  nia naran lolos mak Eko Papa, maibe nia bosok tan autoridade Polísia katak nia naran Juliet Serra Papa.

Tanba ne´e, nia tenta atu desvia autoridade Polísia,  maibe  Polísia treinadu no preparadu hodi identifika suspeitu.

Tuir artigu 171, kódigu penal,  suspeitu nain rua ne´e komete kazu koasaun seksual bele tama kadeia tinan rua ka to’o tinan ualu. Avi

GMN TV | Grupo Média Nacional