DILI, (TATOLI) - Eis-fundadór no
Editór Buletin Kuda Ulun Lian, Maliana, profesór Vicente Paulino lansa nia obra
literatura primeira ho títulu ‘Leituras do Mundo e da Natureza’ ka
leitura mundu nian no natureza iha Kampus Liceu, Universidade Nasionál Timor
Lorosa’e (UNTL), iha loron komemorasaun 30 agostu.
Autór livru, Vicente Paulino
informa ba Ajénsia TATOLI katak nia hakerek livru poema ho títulu ‘Leituras
do Mundo e da Natureza’ tanba realidade katak ita moris iha mundu. Tanba
ne’e, bainhira ita moris iha mundu konserteza ita moris ho natureza.
“Nune’e, ita-nia obrigasaun ne’e
atu hatene natureza ne’e nia lala’ok oinsa? Atu hatene ninia lala’ok, entaun
tenke lee ninia esénsia ne’e rasik,” hateten Editór Ezekutivu Veritas-Revista
Sientífika UNTL, Vicente Paulino.
Profesór ne’e esplika katak
leitura kona-ba mundu no natureza halo ita komprende loloos natureza ninia
sentidu ne’e saida nomós ninia esénsia ne’e saida mai ita?, depois ita-nia
obrigasaun mak atu halo natureza sai buras ne’e oinsa?
Tanba ida ne’e, tuir autór ne’e,
nia introduz nia obra Leitura do Mundo e da Natureza tanba haree
katak mundu ho natureza ne’e buat ida ne’ebé, termus ne’ebé ita labele fahe ba
rua; ne’e iha interligasaun.
Nune’e iha leitura ne’e rasik iha
realidade barak mak nia akresenta hanesan realidade kona-ba moris, mate, oinsa
mak domin bele la’o nomós kona-ba paisajen rasik. Buat hothotu hanesan paradoxu
vida.
Signifikadu ita haree mundu ne’e
hanesan fatuk ki’ik sira ne’ebé iha dalan, entaun ita tenke buka meius oinsa
atu fatuk ki’ikoan sira ne’e iha dalan hodi konstrui mundu ne’e bele di’ak
liutan.
“Ha’u kaer liafuan ida, poeta
brazileiru nian, Carlos Drummond de Andrade dehan tinha uma pedra no meio
do caminho (iha fatuk ida iha dalan klaran). Entaun, ita-nia obrigasaun
mak ida ne’ebé? Pedra (fatuk) ida di’ak ka aat? Ita idaidak tenke foti fatuk
hirak ne’e. Agora transforma fatuk ne’e ba di’ak ka ba aat ne’e ita idaidak nia
hanoin,” dehan péritu komunikasaun UNTL ne’e.
“Ha’u-nia inisiativa lansa obra
ne’e, foti fatuk sira ne’ebé iha tau iha livru ida hodi nune’e leitór sira bele
lee nomós bele komprende kle’an liutan natureza ne’e rasik saida?,” reforsa tan
autór títulu ‘Leituras do Mundo e da Natureza’ ne’e.
Iha lansamentu, autór livru ne’e
mós konvida estudante sira lee no halo aklamasaun ba nia obra ne’e inklui
profesór balun UNTL, reprezenta idaidak nia munisípiu basá tuir autór katak
hakarak halo ida ne’e tanba konsidera haree Timor hanesan mundu ida.
Katak, mundu Timor ne’e kompostu
husi variedade paisajen; animál, plantasaun no ema. Depois, hanoin katak ita
iha diversidade kulturál ida maka’as, hodi nune’e nia hakerek poezia ne’e, tuir
perkursu ne’ebé autór hale’u iha munisípiu sira, nune’e hakarak fahe esperiénsia
sira liuhusi liafuan.
“Ne’e duni, sira iha ne’e hotu
ha’u konvida sira atu lee versu ka liafuan sira ne’ebé ha’u hato’o hodi nune’e
sira rasik bele sente katak sira-nia distritu (munisípiu) ne’e mós iha furak,
iha mundu nia laran. Agora presizamente atu ke’e ne’e mak oinsá? Ida ne’e
ha’u-nia hanoin konvida sira lee, kuandu sira lee ona, iha hanoin atu ke’e iha
sira-nia distritu rasik,” nia dehan.
Profesór Vicente Paulino
konsidera katak hakerek ne’e la fásil no transmite ideia iha versu ne’e mós la
fásil, lori prosesu naruk, mezmu ema balun dehan hakerek ne’e fásil. Atu
hakerek ne’e prosesu ida no lori tempu.
“Tuir loloos ne’e, obra ne’e sai
kle’ur tiha ona mas ha’u hein momentu ne’ebé sertu hodi nune’e ha’u
bele hato’o ha’u-nia inspirasaun liuhusi versu ida ne’e para públiku sira
hatene katak prosesu ida ne’e, prosesu vida ida, hanesan ita ema; moris,
ki’ikoan to’o sai boot (adultu),” nia informa.
Nia mós informa katak obra no
versu ne’ebé nia hato’o ne’e ligadu mós ba prosesu rezisténsia nian ne’ebé nia
rasik mós hola parte. Ne’ebé, perkursu leitura do mundo e da natureza ne’e
engloba buat sira ne’e hotu, tantu triste, tantu kontente, mate, moris, buat
sira ne’e hotu iha laran. Nune’e nia sente matan-been turuk.
“Ida ne’e ha’u sente katak
emosaun boot ida kuandu profesór Miguel Maia hato’o ninia aprezentasaun,
klareza ba obra ne’e rasik. Ha’u sente orgullu no ho nia liafuan sira ne’e
rasik fó sentimentu emotivu ida mai ha’u to’o ha’u-nia matan-been monu. Sente
alegria tanba obra ne’e kle’ur ona mas foin mak sai,” nia haktuir.
Akadémiku ne’e mós fó mensajen ba
estudante sira katak nu’udar estudante iha obrigasaun lee barak. Analojia katak
kail ne’ebé iha ona buka ba kail ikan no presiza iha no halo mós kail foun.
“Nu’udar estudante tenke lori
fali kail ne’ebé foun katak lee barak hodi nune’e bele aumenta tan informasaun,
hakle’an liutan kapasidade analiza, kapasidade halo opiniaun no kapasidade
krítika,” profesór Vicente Paulino fó hanoin.
Iha fatin hanesan, profesór
Miguel Maia, hafoin aprezentasaun no fó klareza liutan kona-ba konteúdu obra
literatura ne’e hateten, livru sira no livru ‘Leitura do Mundo e da Natureza’
husi profesór Vicente Paulino ne’e importante ba estudante no leitór enjerál
inklui interesante sira.
“Nia importánsia halo ema sente
nia aan, oinsa lori nia atu kumprende ninia aan, komprende realidade. Nune’e
husi apresiasaun ne’e muda ita-nia vida, iha ita-nia moris lorloron,” akresenta
profesór universitáriu ne’e.
Partisipa iha lansamentu ne’e
estudante universitáriu, estrutura mikro no makro UNTL balun, profesór,
konvidadu nomós seluk tan.
Entretantu livru ne’e kompostu
husi pájina 126 ho parte importante haat hanesan parte primeiru kona-ba vida,
domin no mate. Parte daruak kona-ba paisajen timor ho nia rekantu sira, parte
tolu kona-ba klínika siénsia no nia mensajen sira nomós parte haat kona-ba keta
hamate eroi klamar nian.
Livru ne’e registradu ho ISBN
(International Standard Book Number) nú. 978-989-8915-05-4 ho edisaun husi Casa
Apoema nomós impresaun no akabamentu ne’e husi Tipografia Silvya Díli.
Alende livru ne’e, autór mós
promote katak sei lansa mós obra literatura seluk ho títulu Viagem nos
Tempos dos Poetas Anteriores de Vida, haree ba tempu no posibilidade sertu.
Perfil Autór
Autór livru ‘Leitura do Mundo e
da Natureza’, Vicente Paulino, orijen husi Munisípiu Bobonaro. Moris iha
Holsa-Oplegul, 01 outubru 1978, husi aman Paulino Vicente (agrikultór) no inan
Agostinha Sabina (doméstika).
Perkursu akadámiku, autór hasai
doutoramentu kona-ba Kultura no Komunikasaun (2009-2012) iha Fakuldade
Humanidade, Universidade de Lisboa.
Mestradu iha Kultura
Kontampóranea no Novas Teknolojia, Siénsia no Komunikasaun (2007-2009) iha
Universidade Nova de Lisboa no hasai lisensiatura kona-ba siénsia komunikasaun
iha Universidade Nova de Lisboa (2004-2007).
Profesór Vicente Paulino, antes
ne’e nu’udar sekretáriu RENETIL, Maliana (1999-2000), fundadór no editór
Buletin Kuda Ulun Lian, Maliana (1999-2001), observadór ba eleisaun Asembleia
Konsituante (2001) no seluk mak nu’udar membru kuadru supervizaun ba Asosiasaun
Timorese-APARATI (2007-2010).
Profesór ne’e mós halo ona
peskiza iha área barak inklui produz mós obra sientífiku sira. Entre obra sira
ne’e, iha obra balun publika ona internasionalmente hanesan:
2011 ‘Remembering the
Portuguese Presence in Timor and Its Contribution to the Making of Timor’s
National and Cultural Identity’. In Laura Pang (ed.), Portuguese and
Luso-Asian Legacies, 1511-2011: Complexities of Engagement, Culture, and
Identity in Southeast Asia. Vol. 2: The Tenacities and Plasticities of Culture
and Identity. Singapura: Institute of Southeast Asian Studies.
2011 ‘A imprensa católica
Seara e a tradição timorense: 1949-1970′, Anais Electrónicas do XI Conlab Salvador-Bahia:
UFBA (versão online).
2011 ‘A imprensa católica
Seara e a tradição timorense: 1949-1973′. In Kelly Silva & Lúcio Sousa
(eds.) Ita Maun Alin – o livro do irmão mais novoLisboa: Edições Colibri.
Dadaun alende profesór nomós peskizadór
ida iha UNTL, autór Vicente Paulino mós nu’udar diretór ba unidade produsaun no
diseminasaun koñesimentu programa pós-graduasaun no peskiza UNTL.
Jornalista: Rafy Belo | Editór:
Manuel Pinto
Imajen: Autór livru, Vicente
Paulino
Sem comentários:
Enviar um comentário